သျှမ်းပြည်တောင်ပိုင်း ၊ ကွန်ဟိန်းမြို့နယ် ၊ရပ်ကွက် (၂) မှာရှိတဲ့ ကုန်စုံဆိုင်တစ်ခုမှာ ဇန်နဝါရီ ၅ ရက် ၊ ညနေခင်း ၅ နာရီအချိန်ခန့်က ဓါးပြတိုက်မှုဖြစ်ပွားပြီး အမျိုးသားတစ်ဦးသေနတ်နဲ့ပစ်ခတ် အသတ်ခံရတယ်လို့ စုံစမ်းသိရ ပါတယ်။
“ မျက်နှာ အုပ်ထားတဲ့ ယောကျ်ားလေး ၃ ယောက်ဆိုင်ထဲကိုဝင်လာတာ သမီးဖြစ်သူကို သေနတ်နဲ့ချိန်ပြီး နင်တို့ရွှေငွေတွေ ဘယ်မှာထားလဲလို့မေးတယ် ၊ သူ့သမီးကလည်း အိမ်ထဲက အဖေဖြစ်သူဆီခေါ်သွားတာ အာ့မှာ သူ့အဖေကို ဓားပြ ၃ ယောက်က သူတို့အိမ်နောက်ဖက်က ဆန် စက်ဆီခေါ်သွားပြီး နားထင်ကိုသေနတ်နဲ့ပစ်သတ်သွားတာ ရွှေငွေတွေလဲပါသွားတယ် ” လို ကွန်ဟိန်း ဒေသခံတစ်ဦးကအတည်ပြုပြောပါတယ်။
ဓါးပြဝင်တိုက်တဲ့ အမည်မသိအမျိုးသား ၃ ဦးဟာ crown အမျိုးအစား အိမ်စီးကားနဲ့ရောက်လာတာဖြစ်ပြီး
မျက်နှာဖုံးတွေစည်းထားလို့ မည်သူမည်ဝါမှန်းမသိရတဲ့အပြင် အသတ်ခံရသူမိသားစု ရဲ့ဆိုင်နဲ့ အိမ်မှာတပ်ဆင်ထားတဲ့ CCTV တွေကိုပါ ဖြုတ်ယူသွားတယ်လို့ သိရပါတယ် ။
” ဘယ်နေရာမှ မလုံခြုံတော့ဘူး ကွန်ဟိန်းလဲ အရင်ကမဖြစ်ဖူးတာတွေကြုံနေရပြီး ညနေက အဲ့ဒီသတင်းကြောင့်
မြို့က ကုန်စုံဆိုင်တွေလည်းကြောက်ပြီး ပိတ်ကုန်တယ် ၊ သတိနဲ့နေကြဖို့ မပေါ့ဆကြဖို့တော့လိုနေပြီ ” လို့ မြို့ခံကပြောပါတယ် ။
စစ်ကောင်စီ အာဏာသိမ်းထားတဲ့ ကာလအတွင်း သျှမ်းပြည်နယ်အပါအဝင် နိုင်ငံနဲ့တစ်ဝှမ်းမှာ ခိုး ဆိုး လု နှိုက် ဒုစရိုက်ဖြစ်စဥ်များ ပိုမိုကျယ်ပြန့်လာတာဖြစ်ပါတယ် ။