သျှမ်းပြည်မြောက်ပိုင်း ကွတ်ခိုင်မြို့မှာ ညီနောင်မဟာမိတ်တပ်တွေဖြစ်တဲ့ ကိုးကန့်တပ် MNDAA နဲ့ တအာင်းတပ် TNLA တို့ နှစ်ဖက်တပ်ဖွဲ့ တိုက်ပွဲဖြစ်နေတယ်လို့ ဒေသတွင်းသတင်းရင်းမြစ်ထံမှ သိရပါတယ်။
ဒီကနေ့ မတ်လ ၁၄ ရက် နံနက် ၁၀ နာရီကျော်အချိန်မှာ လက်နက်ကြီး ပစ်ခတ်သံတွေ စတင်ထွက်ပေါ်နေပြီး ကိုးကန့်တပ်ဘက်က ဒရုံးအသုံးပြုကာ တအာင်းတပ် ရှိရာနေရာကို စတင် တိုက်ခိုက်နေတာလို့ ဒေသတွင်းသတင်းရင်းမြစ်အရ သိရပါတယ်။
ကွတ်ခိုင်မြို့နားက မန့်ပြိန်းအထက်မှာရှိတဲ့ TNLA တပ်စခန်းကို MNDAA က ဒရုံးနဲ့ တိုက်ခိုက်နေတာဖြစ်ပြီး TNLA က လက်နက်ကြီးနဲ့ ပြန်လည်ပစ်ခတ်နေတာလို့ ဆိုပါတယ်။
ယခုလို ညီနောင်မဟာမိတ်တပ်အချင်းချင်း လက်နက်ကိုင် ပဋိပက္ခဖြစ်ပွားလာမှုအပေါ် ဒေသခံ ပြည်သူတွေအနေနဲ့ စိုးရိမ်နေကြတယ်လို့ သိရပါတယ်။
ပြီးခဲ့တဲ့ ဖေဖော်ဝါရီလ ၁၃ ရက်စကပြီး ကွတ်ခိုင်မြို့ပေါ်ရှိ MNDAA ရဲ့ ရုံးတွေကို TNLA က ဝင်ရောက်စီးနင်းခဲ့ကာ ကိုးကန့်တပ်ဖွဲ့ကို မြို့ပြင်ဘက်သို့ အင်အားသုံး ဖယ်ရှားခဲ့တဲ့ ဖြစ်စဥ်ကစခဲ့ပြီး နှစ်ဖက်တပ်ဖွဲ့ တင်းမာမှုဖြစ်ပွားကာ ယခုလို ပစ်ခတ်မှုတွေ ထွက်ပေါ်လာတာပဲ ဖြစ်ပါတယ်။
ကွတ်ခိုင်မှာ ဖြစ်တဲ့ ဖြစ်စဥ်နဲ့ ပတ်သက်ပြီး ကိုးကန့်တပ်နဲ့ တအာင်းတပ်တို့ဖက်က တစ်စုံတစ်ရာ ထုတ်ပြန်လာတာ မရှိသေးပါဘူး။