သျှမ်းပြည်နယ်မြောက်ပိုင်း၊ ကွတ်ခိုင်မြို့တွင် ယနေ့ နိုဝင်ဘာလ(၁)ရက် နံနက်အစောပိုင်းက စစ်ကောင်စီမှ လေကြောင်းဖြင့် (၃)ကြိမ် လာရောက်ဗုံးကြဲတိုက်ခိုက်မှုကြောင့် TNLA တပ်ဖွဲ့ဝင် တစ်ဦး သေဆုံးကြောင်း ဒေသခံသတင်းရင်းမြစ်ထံသိရသည်။
လူတွေအိပ်မောကျနေတဲ့အချိန် နံနက်(၃:၃၀)နာရီခန့်က စစ်ကောင်စီမှ ဂျက်ဖိုက်တာဖြင့် ဗုံး(၁၅)လုံးခန့် လာရောက်ကြဲချသွားရာ ရပ်ကွက်(၃)၊ နတလရုံးဝန်းနှင့် ကွတ်ခိုင်တိုးဂိတ်အနီးမှာ ကျရောက်ပေါက်ကွဲကြောင်း စုံးစမ်းသိရသည်။
” လူတွေ အိပ်ပျော်နေတဲ့အချိန်မှာ မနက်(၃)နာရီကျော်မှာ ဗုံးလာကြဲသွားတာ အိမ်တွေတောင်တုန်တယ်၊ အေးရှားဝေါနဲ့ ယခင် အခွန်ရုံးဟောင်းမှာ ကျတာ တစ်ယောက်သေသွားတယ်လို့ ကြားတယ်” ဟု ဒေသခံတစ်ဦးကပြောသည်။
အခွန်ရုံးဟောင်းမှာ TNLA တပ်ဖွဲ့ဝင်တစ်ဦးေသဆုံးသွားတာနဲ့ ပတ်သက်ပြီး PSLF/TNLA ဘက်ကတစ်စုံတစ်ရာထုတ်ပြကြေငြာခြင်းမရှိသေးပါဘူး။
ပြီးခဲ့သည့် ဩဂုတ်လ(၅)ရက်က ကွတ်ခိုင်မြို့ရှိ မြို့မဈေးနှင့် လူနေရပ်ကွက်တွေထဲသို့ စစ်ကောင်စီက လေကြောင်းဖြင့် ဗုံးကြဲရာ ဒေသခံပြည်သူ(၆)ဦးသေဆုံးပြီး နေအိမ်နှင့် ဆိုင်ခန်းများစွာ ပျက်စီးကြောင်း သတင်းရရှိသည်။
