ယမန်နေ့ ဩဂုတ်လ(၉) ရက်နေ့ ညနေ (၅:၁၅) ခန့်တွင် သျှမ်းပြည်နယ်မြောက်ပိုင်း ကျောက်မဲမြို့နယ် ခိုက်တုန်ဟုန်းရွာ ရထားသံလမ်းကူးအကွေ့၌ ဆိုင်ကယ်နှင့် ၁၂ ဘီးကား မတော်တဆတိုက်မိခဲ့ကြောင်း သိရသည်။
မတော်တဆမှုကြောင့် ဆိုင်ကယ်စီးလာသူသည် ကားဘီးအောက်သို့ရောက်ရှိသွားပြီး အဆိုပါနေရာတွင်ပင် ပွဲချင်းပြီးသေဆုံးခဲ့ရသည်။
“ ကျနော်တို့ ကမ်းလင့်လက်လူမှုကူညီရေးအသင်းကို (၅) နာရီကျော်ကျော်လောက်မှာ ခိုက်တုန်ဟုန်းရွာက ရွာသားတစ်ဦးက ကားနဲ့ဆိုင်ကယ်တိုက်မိလို့ အကြောင်းကြားလာလို့ ချက်ချင်း ကူညီနိုင်ဖို့ လူနာတင်ယာဉ်(၂) စီး တခါတည်းသွားခဲ့တယ်။ ဟိုကိုရောက်သွားတဲ့အချိန် ဆိုင်ကယ်စီးသမားက ကားဘီးအောက်ရောက်ပြီး အဲ့နေရာမှာပဲ သေနေပြီ။ အဲ့ဒါကြောင့် သူ့အလောင်းကိုဆွဲထုတ်ပြီး ကျောက်မဲမြို့နယ် ဆေးရုံက ရေခဲတိုက်ကိုပို့ဆောင်ပေးခဲ့ပါတယ်။” ဟု ကမ်းလင့်လက်များ လူမှုကူညီရေးအသင်းက ဆိုသည်။
သေဆုံးသူသည် မလှိုင်မြို့နယ်၊ ဖျောက်ဆိပ်ကုန်းအုပ်စု ဘီးဇာတ်ကုန်းကျေးရွာတွင် နေထိုင်သူ မောင်မျိုးလှိုင်ဝင်းဖြစ်ကြောင်း ၎င်း၏မှတ်ပုံတင်အရ သိရသည်။
