သျှမ်းပြည်မြောက်ပိုင်း၊ ကျောက်မဲမြို့နယ် တော့ဆန်ကျေးရွာ နဲ့ ရှမ်းပြည်တိုးတက်ရေးပါတီ SSPP/SSA တပ်စခန်းအနီးရှိ လွယ်ရင်တောင်ကို စစ်တက်က ဂျက်ဖိုက်တာနဲ့ ဗုံး ၂ လုံး ကြဲချ တိုက်ခိုက်ခဲ့တယ်လို့ SSPP က ထုတ်ပြန်ထားပါတယ်။
ယမန်နေ့ အောက်တိုဘာလ ၁၁ ရက် နေ့လည်ပိုင်းအချိန်တွင် ကျောက်မဲမြို့နယ် တော့ဆန်ကျေး ရွာအနီးရှိ လွယ်ရင်တောင်တွင် စစ်တပ်က ပေါင် ၂၅၀ ဗုံး တစ်လုံး ကျဲချတိုက်ခိုက်ခဲ့ရာ SSPP တပ်စခန်းနဲ့ မီတာ(၉၀)ခန့် အကွာမှာ ကျရောက်ပေါက်ကွဲခဲ့ပြီး တပ်စခန်းစည်းရိုးအချို့ ဗုံးစ အနည်းငယ် ထိမှန်ခဲ့တယ်လို့ ဆိုပါတယ်။
ဆက်လက်ပြီး စစ်တပ်က ကျောက်မဲမြို့နယ် တော့ဆန်ကျေးရွာ ဘုန်းကြီးကျောင်းအနီးကို ပေါင် ၂၅၀ ဗုံး တစ်လုံးနဲ့ ယင်းနေ့ နေ့လည်ပိုင်းတွင် ထပ်မံကြဲချတိုက်ခိုက်ခဲ့ပြီး ကျောင်းဝန်းအတွင်းရှိ ဇရပ်ဆောင် တစ်ဆောင် ၊ ချက်ပြုတ်ဆောင်တစ်ဆောင် အပါအဝင် ကျောင်းအနီးနားရှိ ဒေသခံပြည်သူ နေအိမ် တစ်လုံး ထိခိုက်ပျက်စီးသွားခဲ့တယ်လို့ ဖော်ပြထားပါတယ်။
စစ်တပ်က နောင်ချိုနဲ့ ကျောက်မဲမြို့ကို ပြန်လည်ထိန်းချုပ်ပြီးတဲ့နောက်ပိုင်း သီပေါ၊ နမ္မတူ၊ နမ့်ဆန်၊ မိုင်းလုံ၊ မိုးမိတ် စတဲ့ မြို့တွေကို လေကြောင်းတိုက်ခိုက်မှုများ ခပ်စိပ်စိပ်လုပ်ဆောင်လာပြီး အရပ်သား ပြည်သူ ထိခိုက်သေဆုံးမှုများ များစွာရှိကြောင်း သိရပါတယ်။