သျှမ်းပြည်မြောက်ပိုင်း၊ ကျောက်မဲမြို့နယ် ပုံဝိုးကျေးရွာအုပ်စု အတွင်းရှိ ပုံဝိုးကျေးရွာနဲ့ ကွမ်ဟင် ကျေးရွာအနီးမှာ မတ်လ ၁၀ ရက်နေ့ နံနက်ပိုင်းက စစ်ကော်မရှင်တပ်နဲ့ ရှမ်းပြည်တိုးတက်ရေးပါတီ ၊ ရှမ်းပြည်တပ်မတော် (SSPP/SSA) တို့အကြား တိုက်ပွဲဖြစ်ပွားခဲ့တယ်လို့ SSPP Info က သတင်း ထုတ်ပြန်ထားပါတယ်။
ပုံဝိုးကျေးရွာအနီး SSPP တပ်စခန်းရှိရာနေရာသို့ စစ်ကော်မရှင်ရဲ့ နောင်ချိုမြို့အခြေစိုက် ခြေမြန်တပ်ရင်း ခမရ(၁၁၅)မှ အင်အား ၁၀၀ ဝန်းကျင်ခန့်က ထိုးစစ်ဆင် ဝင်ရောက်လာပြီး စတင်ပစ်ခတ်ရာမှ နှစ်ဖက် ထိတွေ့တိုက်ပွဲဖြစ်ပွားကာ ၁ နာရီကျော်ကြာမြင့်ခဲ့တယ်လို့ ဆိုပါတယ်။
လက်ရှိအချိန်မှာ စစ်ကော်မရှင်ဘက်မှ ပုံဝိုးကျေးရွာ ၊ ကွမ်ဟင်ကျေးရွာ ၊ တော်လေကျေးရွာနဲ့ လေလွယ် ကျေးရွာတို့မှာ စစ်အင်အားဖြည့်တင်းကာ နှစ်ဘက်စစ်ရေးတင်းမာမှုများ ဆက်ရှိနေတယ်လို့ သိရပါတယ်။
မနေ့က ကျောက်မဲမြို့နယ်အတွင်းမှာ ဖြစ်ပွားတဲ့ နှစ်ဖက်တိုက်ပွဲနဲ့ ပတ်သက်ပြီး စစ်ကော်မရှင်ဘက်က ယနေ့နံနက်ပိုင်းအထိ တစ်စုံတစ်ရာ ထုတ်ပြန်ထားတာမရှိသေးပါဘူး။