စစ်တပ်ကကျင်းပခဲ့တဲ့ ရွေးကောက်ပွဲ အပိုင်း(၁)မှာ စစ်တပ်ကိုထောက်ခံတဲ့ လူများက မဲရုံသို့လာပြီး မဲပေးကြတဲ့သူတွေရှိသလို တစ်ဖက်မှာလည်း စစ်တပ်လက် အောက်ခံ လူတစ်စုရဲ့ ခြိမ်းခြောက်မှု၊ ဖိအားပေးမှုတွေကြောင့် မဲရုံသို့ လာရောက် မဲပေးကြသူများလည်း ရှိတယ်လို့ သိရပါတယ်။
အခုရွေးကောက်ပွဲဟာ ၂၀၁၅ နဲ့ ၂၀၂၀ ခုနှစ်တုန်းက ကျင်းပခဲ့တဲ့ ရွေးကောက်ပွဲလောက် လူထုစိတ်ဝင်စားမှု မရှိသလောက်နည်းပါးပြီး မဲရုံသို့ လာရောက် မဲပေးကြသူများဟာလည်း စစ်တပ်ထောက်ခံတဲ့ လူအုပ်စုနဲ့ ဖိအားပေးခံရတဲ့ လူအုပ်စုများကလွှဲရင် မရှိသလောက်နည်းပါးတယ်လို့ သိရပါတယ်။
ရန်ကုန်၊ မန္တလေးနဲ့ ချင်းပြည်နယ် အပါအဝင် စစ်တပ်က ၎င်းတို့ကျင်းပတဲ့ ရွေးကောက်ပွဲကို မဲမပေးလျှင် စစ်မှုထမ်းခေါ်ခြင်း၊ ဒဏ်ငွေရိုက်ခြင်း၊ပေါ်တာဆွဲခြင်းများ ပြုလုပ်သွားမယ်လို့ ဖိအားပေးခြိမ်းခြောက်မှုတွေ ရှိနေတယ်လို့ ဒေသတွင်း သတင်းရင်းမြစ်ထံမှ သိရပါတယ်။
ဒါ့အပြင်သျှမ်းပြည်နယ်မြောက်ပိုင်း လားရှိုးမြို့မှာလည်း စစ်တပ်ခန့် ရပ်ကွက်အုပ်ချုပ်ရေးအဖွဲ့မှ ရပ်ကွက်ဒေသခံတွေဆီ မဲလက်မှတ်စာရွက် အိမ်တိုင်ရာရောက် ပေးဝေခဲ့ကာ မဲသွားထည့်ရန် လိုက်လံလှုံ့ဆော်မှုလည်းရှိတယ်လို့ စုံစမ်းသိရပါတယ်။
” မဲရုံံမှာ မဲသွားထည့်ကြတဲ့သူတွေ နည်းတယ်၊ စစ်တပ်က မဲမထည့် မနေရဆိုတဲ့ ဖိအားပေးမှုကြောင့်သာ သွားခဲ့ရတယ်လို့ ” ကိုယ်တိုင်ကြုံတွေ့သူက ပြောပါတယ်။
မြန်မာနိုင်ငံ စုစုပေါင်း ၃၃၀ မြို့နယ်ရှိတဲ့အထဲ ရွေးကောက်ပွဲ ကျင်းပနိုင်တဲ့ မြို့နယ်ဟာ ၁၃၁ မြို့နယ်သာရှိပြီး ရွေးကောက်ပွဲ လုံးဝမကျင်းပနိုင်တဲ့ မြိုနယ်ပေါင်း ၆၅ မြို့နယ်ရှိတယ်လို့ စစ်ေကာ်မရှင်က ကြေညာထားပါတယ်။
ရွေးကောက်ပွဲကို အပိုင်းလိုက်ကျင်းပကာ အပိုင်း(၁)ကို ယမန်နေ့က ၁၀၂ မြို့နယ်မှာ ကျင်းပပြီးစီးခဲ့ပြီး အပိုင်း(၂)ကို ဇန်နဝါရီ ၁၁ ရက်နေ့မှာ ၁၀၀ မြို့နယ်၊ အပိုင်း(၃)ကိုတော့ ဇန်နဝါရီလ ၂၅ ရက်နေ့မှာ မြို့နယ် ၆၃ မြို့နယ်မှာ ကျင်းပသွားမယ်လို့ ထုတ်ပြန်ထားပါတယ်။