ဒီကနေ့ မတ်လ ၁၈ ရက် နံနက်ပိုင်းက နေပြည်တော်မှာ ကျင်းပတဲ့ တတိယအကြိမ် အမျိုးသား လွှတ်တော် ပထမပုံမှန်အစည်းအဝေးမှာ အမျိုးသားကာကွယ်ရေးနှင့် လုံခြုံရေးကောင်စီရဲ့ အမှုဆောင် ချုပ်ဖြစ်တဲ့ ဦးအောင်လင်းဒွေး ဟာ အမျိုးသားလွှတ်တော်ဥက္ကဋ္ဌ ဖြစ်လာခဲ့ပါတယ်။
တတိယအကြိမ် အမျိုးသားလွှတ်တော်အစည်းအဝေး ပထမနေ့ အစီအစဥ်မှာ သဘာပတိအဖြစ် USDP ပါတီက ဒေါ်ဒွဲဘူ က တာဝန်ယူဆောင်ရွက်ပြီး အမျိုးသားလွှတ်တော် ဥက္ကဋ္ဌ ရွေးချယ်ရာမှာ ဦးအောင်လင်းဒွေးကို အမျိုးသားလွှတ်တော် ဥက္ကဋ္ဌ အဖြစ် တစ်ဦးတည်း အမည်တင်သွင်းကာ ပြိုင်ဖက်မရှိဘဲ ဥက္ကဋ္ဌ အဖြစ် အတည်ပြုတင်မြောက်လိုက်တာဖြစ်ပါတယ်။
အမျိုးသားလွှတ်တော်ဥက္ကဋ္ဌဟာ သမ္မတတွေ ရွေးချယ်တင်မြောက်မယ့် ပြည်ထောင်စုလွှတ်တော် အစည်းအဝေးမှာ နာယကအဖြစ် ဦးစီးပြီး ခေါ်ယူကျင်းပရမယ့်သူဖြစ်ပါတယ်။
ဒုတိယဥက္ကဋ္ဌ ကိုတော့ စစ်ကော်မရှင်ရဲ့ အားကစားနှင့် လူငယ်ရေးရာ၊ ဟိုတယ်နှင့် ခရီးသွားလာရေး ဝန်ကြီးဌာန နှစ်ခုကို ပူးတွဲကိုင်ထားတဲ့ ကချင်လူမျိုး Jeng Phang နော်တောင် အား ရွေးချယ် တင်မြှောက်လိုက်တာဖြစ်ပါတယ်။
တတိယအကြိမ် အမျိုးသားလွှတ်တော်မှာ FPTP နဲ့ PR ရွေးကောက်ပွဲစနစ်မှ လွှတ်တော်ကိုယ်စားလှယ် ၁၅၇ ယောက်နဲ့ တပ်မတော်သား အမျိုးသားလွှတ်တော်ကိုယ်စားလှယ် ၅၆ ယောက် စုစုပေါင်း ကိုယ်စားလှယ် ၂၁၃ ယောက်ရှိပြီး ကြံ့ခိုင်ရေးပါတီ USDP က ၁၀၈ နေရာနဲ့ အမတ်နေရာ အများဆုံး ရရှိထားတာပဲဖြစ်ပါတယ်။