ယနေ့ (၁၁.၄.၂၀၂၃) ရက်နေ့ နံနက်ပိုင်းတွင် စစ်ကိုင်းတိုင်းဒေသကြီး၊ ကန့်ဘလူမြို့နယ်၊ ပဇီကြီးကျေးရွာ၊ ပြည်သူ့အုပ်ချုပ်ရေးအဖွဲ့ရုံးခန်း ဖွင့်ပွဲပြုလုပ်နေစဉ် စစ်ကောင်စီမှ လေကြောင်းတိုက်ခိုက်မှု ပြုလုပ်ခဲ့ကြောင်း သတင်းရရှိသည်။
ဂျက်တိုက်လေယာဉ်တစ်စင်းနှင့် MI-35 လေယာဉ်တစ်စင်းမှ နံနက် ၇ နာရီခွဲဝန်းကျင်ခန့်တွင် လာရောက်ပစ်ခတ်ခြင်းဖြစ်ပြီး သေဆုံးသူအလောင်း (၅၀) ဦးကျော် တွေ့ရှိထားကြောင်း ဒေသသတင်းအရင်းအမြစ်များထံ သိရသည်။
အပိုင်းပိုင်းပြတ်နေသော ရုပ်အလောင်းများနှင့် ကလေးငယ်အလောင်းများ၊ အမျိုးသမီးအလောင်းများပါ တွေ့ရှိထားပြီး ထိခိုက်ဒဏ်ရာရရှိသူနှင့် သေဆုံးသူ ရာကျော်နိုင်သည်ဟု သိရသည်။
ပြည်သူ့အုပ်ချုပ်အဖွဲ့ရုံးခန်း ဖွင့်ပွဲကို အနီးအနားရှိ ကျေးရွာများထံ ဖိတ်ကြားထားခြင်းကြောင့် သေဆုံးသူများသည် ဒေသခံပြည်သူများ ၊ ဝန်းရံသူများနှင့် ပြည်သူ့ကာကွယ်ရေးတပ်ဖွဲ့ဝင်များ ဖြစ်ကြောင်း ဖော်ပြသတင်းများတွင် တွေ့နိုင်သည်။
ကန့်ဘလူမြို့နယ်၊ ပဇီကြီးကျေးရွာ တိုက်ခိုက်ခံရမှုနှင့်ပတ်သက်၍ “စစ်ကောင်စီက အရပ်သားနှင့်လက်နက်ကိုင်ဟူ၍ ခွဲခြားခြင်းမရှိ အလွန်အကျွံ အင်အားသုံး တိုက်ခိုက်နေခြင်းဖြစ်ကာ စစ်ရာဇဝတ်မှုကျူးလွန်ခြင်းဖြစ်ကြောင်း” NUG မှ ထုတ်ပြန်ထားသည်။