ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်တောင်ပိုင်း ဆီဆိုင်မြို့နယ် မြကန်သာရပ်ကွက်မှ အသက်(၇၁)နှစ်အရွယ်ရှိ ဒေါ်စိုးစိုးလတ်သည် ယမန်နေ့ ဇွန်လ (၆)ရက်နေ့က မြေမြုပ်မိုင်းနင်းမိပြီး ခြေထောက်တစ်ဖက်ပြတ်ထွက်သည်အထိ ဒဏ်ရာပြင်းထန်စွာ ရရှိခဲ့သည်ဟု သိရသည်။
ဒေါ်စိုးစိုးလတ်သည် ၎င်း၏နေအိမ်ခြံစည်းရိုးအား ပြန်လည်ပြုပြင်နေစဉ် တိုက်ပွဲအတွင်းက မပေါက်ကွဲသေးဘဲ ကျန်နေသေးသော မြေမြုပ်မိုင်းနင်းမိခဲ့ခြင်းဖြစ်သည်။ ခြေထောက်တစ်ဖက်ပြတ်ထွက်သွားသည့်အပြင် အခြားခြေထောက်တစ်ဖက်နှင့် လက်(၂)ဖက်တွင်လည်း ထိခိုက်ဒဏ်ရာပြင်းထန်စွာရရှိခဲ့သည်ဟုဆိုသည်။ ၎င်းအား အောင်ပန်းမြို့ စစ်ဆေးရုံသို့ ပို့ဆောင်ကုသစေလျက်ရှိသည်။
“မနက်(၉)နာရီလောက်မှာ မြို့ထဲမှာ ပေါက်ကွဲသံအကျယ်ကြီးထွက်လာတော့ မြို့သူမြို့သားတွေက တိုက်ပွဲပြန်ဖြစ်ပြီထင်ပြီး လန့်သွားကြတာပေါ့။ နောက်တော့မှ မပေါက်ကွဲသေးတဲ့ မြေမြုပ်မိုင်း နင်းမိလို့ ပေါက်ကွဲတာဆိုပြီး သိရတယ်။ အခုတော့ ဆီဆိုင်မြို့ထဲကို ပြည်သူတွေတော်တော်များများပြန်လာနေကြပေမယ့် အခုထိ လန့်နေကြတုန်းပါပဲ။ မြို့ထဲမှာတော့ PNO အဖွဲ့တွေရော စစ်ကောင်စီအဖွဲ့တွေရော ရှိနေကြတယ်။”ဟု ဆီဆိုင်ဒေသခံတစ်ဦးကပြောပြသည်။
ဆီဆိုင်မြို့နယ်တွင် တိုက်ပွဲကြောင့် မပေါက်ကွဲသေးသော လက်နက်ကြီးကျည်များနှင့် မြေမြုပ်မိုင်းများစွာ ကျန်ရှိနေသေးပြီး ယနေ့အထိ မိုင်းရှင်းလင်းရေးလုပ်ငန်း မပြုလုပ်သေးဘဲ စစ်ကောင်စီအဖွဲ့က ဒေသခံများအား နေအိမ်ပြန်လာနေစေခြင်းဖြစ်သည်။
