စစ်ကော်မရှင် ကျင်းပမယ့် ရွေးကောက်ပွဲ အပိုင်း ၁ နဲ့ အပိုင်း ၂ မှာ သျှမ်းပြည်နယ်အတွင်းရှိ မြို့နယ် ၁၁ မြို့နယ်မှ ရပ်ကွက် ၁၇ ရပ်ကွက်နဲ့ ကျေးရွာအုပ်စု ၁၉၅ အုပ်စု စုစုပေါင်း ၂၁၂ ခုမှာ ရွေးကောက်ပွဲ ကျင်းပရန် အခြေအနေမရှိကြောင်း စစ်ကော်မရှင်က ယမန်နေ့ညမှာ ထုတ်ပြန်ကြေညာထားပါတယ်။
ရွေးကောက်ပွဲ အပိုင်း(၁)မှာ နောင်ချိုမြို့နယ်ရှိ ကျေးရွာအုပ်စု ၄ အုပ်စု၊ မူဆယ်မြိုနယ် မုံးကိုးမြို့ရှိ ၇ ရပ်ကွက်၊ မန့်ဟီးရိုးမြို့ရှိ ၃ ရပ်ကွက်၊ ပန်ဆိုင်း(ကြူကုတ်) မြို့ ၅ ရပ်ကွက်နဲ့ ကျေးရွာအုပ်စု ၆၃ အုပ်စု၊ လားရှိုးမြို့နယ်ရှိ ကျေးရွာ အုပ်စု ၆၄ အုပ်စု စတဲ့ နယ်မြေများကို ရွေးကောက်ပွဲ ကျင်းပမှာ မဟုတ်ဘူးလို့ ဆိုပါတယ်။
ဒါ့အပြင် ဇန်နဝါရီလ ၁၁ ရက်မှာ ကျင်းပမယ့် ရွေးကောက်ပွဲ အပိုင်း(၂)မှာ မိုင်းခတ်မြို့နယ်ရှိ ကျေးရွာအုပ်စု ၄ အုပ်စု၊ မိုင်းဖြတ်မြို့နယ်ရှိ လုံကောင့်ကျေးရွာ အုပ်စု၊ တန့်ယန်းမြို့နယ်ရှိ ကျေးရွာအုပ်စု ၁၆ အုပ်စု၊ မိုင်းရယ်မြို့နယ်ရှိ ကျေးရွာ အုပ်စု ၈ အုပ်စု၊ မိုင်းတုံမြို့နယ်ရှိ ကျေးရွာအုပ်စု ၃ အုပ်စု၊ မိုင်းယောင်းမြို့နယ်ရှိ ကျေးရွာအုပ်စု ၈ အုပ်စု၊ မိုင်းယန်းမြို့နယ် မိုင်းပေါက်မြို့မှ ရပ်ကွက် ၂ ခုနှင့် ကျေးရွာအုပ်စု ၁၃ အုပ်စုနဲ့ မောက်မယ်မြို့နယ်ရှိ ကဒူးကြီးကျေးရွာအုပ်စု တို့ကို ရွေးကောက်ပွဲ ကျင်းပရန် အခြေအနေမရှိဘူးလို့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ စက်တင်ဘာလ က တနိုင်ငံလုံးအတိုင်းအတာအနေနဲ့ ရွေးကောက်ပွဲ ကျင်းပနိုင်ခြင်းမရှိတဲ့ မြို့နယ် ၅၆ မြို့နယ်ရှိတယ်လို့ စစ်ကော်မရှင်က အသိပေးထားပါတယ်။
စစ်ကောင်စီက ကျင်းပမယ့် ရွေးကောက်ပွဲဟာ ပြည်သူလူထုရဲ့ စိတ်ဝင်စားမှု နည်းပါးနေသလို တဖက်မှာလည်း အတုအယောင်ရွေးကောက်ပွဲမှာ မပါဝင်ဖို့ နဲ့ ရသမျှနည်းလမ်းပေါင်းစုဖြင့် ဆန့်ကျင် တိုက်ဖျက်သွားကြဖို့ အရပ်ဖက်အဖွဲ့အစည်းနဲ့ တော်လှန်ရေးတပ်ဖွဲ့တွေက တိုက်တွန်းထားပါတယ်။