ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
ယမန်နေ့ စက်တင်ဘာလ (၁၃) ရက်နေ့ ညပိုင်းခန့်တွင် သျှမ်းပြည်နယ်မြောက်ပိုင်း လားရှိုးမြို့၌ မိုးသည်းထန်စွာရွာသွန်းမှုကြောင့် လားရှိုးမြို့အတွင်း ရေကြီးရေလျှံမှု ဖြစ်ပွားခဲ့ကြောင်း သတင်းရရှိသည်။
သျှမ်းပြည်နယ်မြောက်ပိုင်းတွင် လားရှိုးမြို့နယ်၌ ယမန်နေ့မွန်းလွဲ (၁း၃၅) အချိန်ခန့်ကစတင်ပြီး မိုးအဆက်မပြတ်ရွာသွန်းပြီး တောင်ကျရေများ ဆင်းလာမှုကြောင့် လားရှိုးမြို့ပေါ် ရပ်ကွက် (၅၊ ၆၊ ၇၊ ၈၊ ၁၂) အတွင်း ရေကြီးရေလျှံမှု ဖြစ်ပွားပြီး လူနေအိမ်များအတွင်းထိ ရေဝင်ရောက်ခဲ့သည်။
ညနက်ပိုင်းအထိ မိုးတိတ်ခြင်းမရှိဘဲ ရပ်ကွက်အချို့တွင် ရေဝင်ပြီး နေအိမ်အတွင်း ပိတ်မိခြင်းများအပြင် အုတ်တံတိုင်းပြိုကျမှုကြောင့် လူတစ်ဦးပိမိပြီး သေဆုံးခဲ့ရသည်။
“လားရှိုးမြို့မှာ မိုးကြီးရင် အမြဲတမ်းရေကြီးရေလျှံမှုတွေ ဖြစ်နေကျပဲ။ ရေကြီးပြီဆိုရင်လည်း အုတ်တံတိုင်းတွေ ပြိုကျမှုတွေဖြစ်လိုဖြစ်၊ လမ်းမကြီးတွေလည်း ရေတွေပိတ်တာတွေဖြစ်နေကျပဲ။ မနေ့ညကတော့ ပရဟိတလူမှုကူညီရေးအဖွဲ့တွေတော့ ရပ်ကွက်အချို့မှာ ပိတ်မိနေတဲ့သူတွေကို လိုက်လံကူညီပေးနေတာတွေရှိတယ်။ အုတ်တံတားပြိုလို့ လူတစ်ယောက်အုတ်တံတားပိမိပြီး သေဆုံးခဲ့ရတယ်။” ဟု လားရှိုးဒေသခံတစ်ဦးက ပြောပြသည်။
ယနေ့ နံနက်ပိုင်းအထိ မိုးဆက်လက်ရွာသွန်းနေပြီး နံနက် (၁၀) နာရီခန့်မှသာ မိုးအနည်းငယ်စဲသွားကြောင်း သိရသည်။
