ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်မြောက်ပိုင်း လားရှိုးမြို့ (၅) ရပ်ကွက်ရှိ (၅၀၇) စစ်ကောင်စီတပ်အား ယနေ့ ဇွန် (၅) ရက်နေ့ နံနက် (၄) နာရီခန့်တွင် MNDAA က လက်နက်ကြီး လက်နက်ငယ်များဖြင့် လာရောက်ပစ်ခတ်တိုက်ခိုက်ခဲ့ကြောင်း သတင်းရရှိသည်။
သျှမ်းပြည်နယ်မြောက်ပိုင်းရှိ MNDAA တပ်စခန်းများကို စစ်ကောင်စီတပ်က ဇွန်လ (၂) ရက်ကစပြီး ထိုးစစ်ဆင်တိုက်ခိုက်ခဲ့ပြီး (၃) ရက်ဆက်တိုက် တိုက်ပွဲဖြစ်ပွားခဲ့သည်။ လားရှိုးမြို့နယ်အပြင် သိန္တီမြို့တွင်လည်း ယမန်နေ့ညက လက်နက်ကြီးလက်နက်ငယ် အသံများကြားခဲ့ရကြောင်း ဒေသခံများက ဆိုသည်။
“စစ်ကောင်စီနှင့် မြောက်ပိုင်းမဟာမိတ်တို့ သျှမ်းပြည်နယ်အရှေ့ပိုင်း မိုင်းလားမြို့မှာ တွေ့ဆုံဆွေးနွေးခဲ့ပေမယ့် ဆွေးနွေးပွဲပျက်ပြီးနောက် စစ်ကောင်စီမှ ထိုးစစ်ဆင်လာခြင်းဖြစ်နိုင်တယ်။ ဆွေးနွေးပွဲကို ဇွန်လ (၁) ရက်နေ့ကနေ ဇွန်လ (၃) ရက်နေ့အထိ ကျင်းပဖို့ စီစဉ်ခဲ့ပေမယ့် ဇွန်လ (၂) ရက်နေ့မှာပဲ ပျက်သွားတယ်။ သူတို့အတွင်းထဲမှာ ဘယ်လိုအကြောင်းတွေ ဆွေးနွေးပြီး ဘာကြောင့် အစည်းအဝေးပျက်သွားတယ်ဆိုတာကိုတော့ ထုတ်ပြန်မလာဘူး။ တရုတ်ကြားဝင် ညှိနှိုင်းပေးရင်းကနေ အခုက ပိုပြီး စစ်ရေးအရတင်းမာလာတဲ့ အနေအထားလို့ ဆိုရမယ်။”ဟု သျှမ်းပြည်နိုင်ငံရေးလေ့လာသူတစ်ဦးကဆိုသည်။
ဇွန်လ (၂) ရက်နေ့ တိုက်ပွဲအတွင်း MNDAA တပ်စခန်း (၃) ခုကို စစ်ကောင်စီက ထိုးစစ်ဆင်တိုက်ခိုက်ရာတွင် MNDAA တပ်သားအချို့ ကျဆုံးခဲ့ကြောင်း သတင်းရရှိသည်။
