သျှမ်းပြည်နယ်တောင်ပိုင်း ရပ်စောက်မြို့၌ ငွေကျပ်တန်ဖိုး ၁ ဘီလီယံကျော်သည့် ဘိန်းဖြူဘလောက်တုံးများ ဖမ်းဆီးရမိ

သျှမ်းပြည်နယ်တောင်ပိုင်း ရပ်စောက်မြို့နယ်ရှိ စစ်ကောင်စီအဖွဲ့၏ စစ်ဆေးရေးဂိတ်တစ်ခု၌ ငွေကျပ်တန်ဖိုး ၁ ဘီလီယံကျော်တန်ဖိုးရှိ ဘိန်းဖြူဘလောက်တုံး (၁၉၅)တုံး၊ အလေးချိန် (၆၈.၂၅) ကီလိုအား ဖမ်းဆီးရမိခဲ့ကြောင်း စစ်ကောင်စီ၏ မူးယစ်ဆေးဝါး တားဆီးနှိမ်နှင်းရေးရဲတပ်ဖွဲ့၏ သတင်းဖော်ပြမှုအရ သိရသည်။

အဆိုပါမူးယစ်ဆေးဝါးများကို မေလ (၂၂)ရက်နေ့ နံနက် ၁၁နာရီခွဲခန့်တွင် အင်တော်မြို့မှ ရပ်စောက်မြို့သို့ မောင်းနှင်လာသည့် PRADO နှင့် TOYOTA HILUX ယာဉ်အား ရပ်တန့်စစ်ဆေးရာမှ ဘိန်းဖြူများကို ရှာဖွေတွေ့ရှိခဲ့ခြင်းဖြစ်ကြောင်း ဖော်ပြထားသည်။

အဆိုပါ ဘိန်းဖြူများကို သျှမ်းပြည်နယ်မြောက်ပိုင်း မိုင်းရယ်မြို့မှ သျှမ်းပြည်နယ်တောင်ပိုင်း ဖယ်ခုံမြို့သို့ သယ်ဆောင်ခြင်းဖြစ်ပြီး ယာဉ်မောင်းများဖြစ်သည့် ရီဝေမောင်၊ စံတင်နှင့် တင်လှိုင်တို့ (၃)ဦးအား ဖမ်းဆီးအရေးယူထားကြောင်း သတင်းရရှိသည်။