လားရှိုးမှာ တရုတ်နှစ်သစ်ကူးပွဲ တစ်လကြာကျင်းပမယ်

ကိုးကန့်တပ် (MNDAA)ကသိမ်းယူထားပြီး အထူးဒေသ (၁) အဖြစ် သတ်မှတ်ထားတဲ့ သျှမ်းပြည်မြောက်ပိုင်း လားရှိုးမြို့မှာ တရုတ်နှစ်သစ်ကူးပွဲ တစ်လကြာ ကျင်းပမယ်လို့ သိရပါတယ် ။

လာမယ့် ဇန်နဝါရီ ၂၈ ရက်ကနေ ဖေဖော်ဝါရီလကုန်အထိ တရုတ်နှစ်သစ်ကူးပွဲတော်ကို စည်ကားသိုက်မြိုက်စွာ ကျင်းပသွားမယ်လို့ လားရှိုးမြို့ ပြန်လည်ထူထောင်ရေးအဖွဲ့က သတင်းထုတ်ပြန်ထားပါတယ်။

” ရိုးရာအကအလှတွေ၊တိုင်းရင်းသား‌ပေါင်းစုံရဲ့ရိုးရာအကတွေ၊ ရိုးရာဂျင်ပေါက်ပြိုင်ပွဲတွေနဲ့ စည်စည်ကားကားကျင်းပသွားမှာပါ၊ဈေးဆိုင်ခန်းတွေ၊ကလေးကစားကွင်းနဲ့ပျော်ရွှင်ဖွယ်ရာ စုံလင်စွာ ပါမှာဖြစ်တဲ့အတွက် လာရောက်ဆင်နွှဲကြဖို့ ဖိတ်ခေါ်ပါတယ်” လို့

နှစ်သစ်ကူးအခမ်းအနားဖြစ်မြောက်ရေးတာဝန်ရှိသူက

ပြောပါတယ်။

လားရှိုးမြို့ကို MNDAA က ၂၀၂၄ ခုနှစ် သြဂုတ်လမှာ သိမ်းယူပြီး အထူးဒေသ (၁) အဖြစ် သတ်မှတ်ထားတာဖြစ်ပါတယ်။ လားရှိုးမြို့သိမ်းယူခံရချိန်က စစ်ကောင်စီဟာ နေ့စဉ်ရက်ဆက်ဆိုသလို လေကြောင်းကနေ ဗုံးကြဲတိုက်ခိုက်ခဲ့တာတွေအပြင် အရပ်သားတွေ ထိခိုက်သေဆုံးခဲ့သလို နေအိမ်တွေလည်း ပျက်စီးခဲ့ပါတယ်။

MNDAA နဲ့ စစ်ကောင်စီကိုယ်စားလှယ်တို့ဟာ တရုတ်အစိုးရရဲ့ကြားဝင်စေ့စပ်ပေးမှုတွေကြောင့် တရုတ်နိုင်ငံ ကူမင်းမြို့မှာ တွေ့ဆုံဆွေးနွေးပြီးနောက် ဇန်နဝါရီ ၁၈ ရက်နေ့ကစလို့ အပစ်အခတ်ရပ်စဲဖို့ နှစ်ဘက်သဘောတူခဲ့ကြပြီး လက်ရှိ လားရှိုးမြို့မှာ MNDAA က တရုတ်နှစ်သစ်ကူးပွဲတော်အတွက် ပြင်ဆင်နေပါတယ်။

အပစ်ရပ်ပြီးနောက် လားရှိုးမြို့ကနေ ထွက်ပြေးတိမ်းရှောင်နေကြတဲ့ ဒေသခံတချို့ နေရပ်ပြန်လာနေကြသလို ကိုးကန့်ဒေသနဲ့ တရုတ်နယ်စပ်ကို ဆက်သွယ်ထားတဲ့ ကိုးကန့်ဒေသ ချင်းရွှေဟော်နဲ့ ရန်လုံကျိုင်း နယ်စပ်ဂိတ်တွေကို တရုတ်နိုင်ငံဘက်က ပြန်ဖွင့်ပေးခဲ့တယ်လို့ သိရပါတယ် ။

Photo – လားရှိုးမြို့ ပြန်လည်ထူထောင်ရေးအဖွဲ့