လားရှိုးမြို့တွင် လူမှုကူညီရေးလုပ်ငန်းလုပ်ဆောင်နေသော ပရဟိတအဖွဲ့ခေါင်းဆောင်တစ်ဦး စနိူက်ဘာဖြင့် ပစ်ခတ်ခံရ

သျှမ်းပြည်နယ်မြောက်ပိုင်း လားရှိုးမြို့၌ စစ်ပွဲကာလအတွင်း ပိတ်မိနေသော ဒေသခံပြည်သူများအား ကူညီကယ်ဆယ်ရေးလုပ်ငန်း လုပ်ဆောင်နေသော လားရှိုးအခြေစိုက်လူမှုကူညီရေး အသင်းဖြစ်သည့် ရွှေသံလွင် နာရေးကူညီမှုအသင်းအဖွဲ့၏ ခေါင်းဆောင်ဖြစ်သူ စိုင်းလားရှိုးသည် ယနေ့(၂၅.၇.၂၀၂၄)ရက်နေ့ နံနက် (၇)နာရီခန့်တွင် စနိူက်ဘာဖြင့် ပစ်ခတ်ခံရပြီး ခြေထောက်ကို ထိမှန်ဒဏ်ရာ ရရှိခဲ့သည်ဟု သိရသည်။

လားရှိုးမြို့အတွင်း တိုက်ပွဲကြောင့် ပိတ်မိသော ပြည်သူများအား ကူညီရေးလုပ်ငန်းများ ဆောင်ရွက်ရန် လူမှုကူညီရေးအသင်းအဖွဲ့အနည်းငယ်သာ ကျန်ရှိပြီး ထိုအထဲတွင် ရွှေသံလွင် နာရေးကူညီရေးအသင်းလည်း တစ်ဖွဲ့အပါအဝင်ဖြစ်သည်။

“ကျနော်တို့အဖွဲ့က ရပ်ကွက်တွေထဲမှာ ပိတ်မိနေတဲ့သူတွေကို အစားအသောက်တွေ ဝယ်ပေးတာတွေလုပ်ပေးတယ်။ သခင်တွေက ထွက်ပြေးသွားပြီး အိမ်မှာကျန်နေတဲ့ အိမ်မွေးတိရိစ္ဆာန်တွေကို အစာလိုက်ကျွေးပေးတယ်။ လားရှိုးကနေ တိမ်းရှောင်ချင်တဲ့သူတွေရှိရင် ကြိုပေးပြီး လားရှိုးကနေထွက်မယ့်ကားတွေဆီပို့ပေးတာတွေလုပ်ပေးတယ်။ အခုမနက်တော့ ကျနော်တို့ အဖွဲ့ခေါင်းဆောင် အပစ်ခံလိုက်ရတယ်။ ဘယ်အဖွဲ့ကပစ်တာလဲဆိုတာတော့ မသိပါဘူး။ ဒါပေမယ့် ကူညီကယ်ဆယ်ရေးလုပ်ငန်းကိုတော့ ကျနော်တို့ ဆက်လုပ်သွားမှာဖြစ်ပါတယ်။”ဟု ရွှေသံလွင် နာရေးကူညီရေးအသင်း အဖွဲ့ဝင်တစ်ဦးက ပြောသည်။

လက်ရှိတွင် သျှမ်းပြည်နယ်မြောက်ပိုင်း လားရှိုးမြို့ရှိ အရှေ့မြောက်တိုင်း စစ်ဌာနချုပ်အား MNDAA နှင့် ပူးပေါင်းအဖွဲ့က ဝင်ရောက်သိမ်းပိုက်နိုင်ပြီဟု သတင်းထွက်ပေါ်ခဲ့သော်လည်း မြို့အတွင်း တိုက်ပွဲဆက်လက်ဖြစ်ပွားနေသေးသည်ဟု သတင်းရရှိသည်။