လားရှိုးမြို့တွင် ည(၆)နာရီကျော်မှ အိမ်ပြန်လာသော ပြည်သူတစ်ဦး ပစ်သတ်ခံရ

သျှမ်းပြည်နယ်မြောက်ပိုင်း လားရှိုးမြို့တွင် ယမန်နေ့ နိုဝင်ဘာလ (၁၈) ရက်နေ့ (၆) နာရီခွဲခန့်က ခြံမှာပြန်လာသော ဝ အမျိုးသားတစ်ဦးအား စစ်ကောင်စီတပ်က မေးမြန်းခြင်းမရှိဘဲ ၎င်း၏နေအိမ်ရှေ့အထိ ကားဖြင့်လိုက်လာပြီး ပစ်သတ်ခဲ့ကြောင်း သိရသည်။

“ လားရှိုးမှာက ပြောရမယ်ဆိုရင် နေ့ခင်းပိုင်းဆိုရင်တော့ ပုံမှန်လိုမျိုးလည်ပတ်နေပြီလို့ပြောလို့ရတယ်။ လူတွေကပုံမှန်သွားလာနေကြပြီပေါ့လေ။

ညပိုင်းတော့ တစ်ချက်တစ်ချက် လက်နက်ကြီးပစ်ခတ်သံတွေကတော့ ကြားနေရတုန်းပဲ။ အခု မာရှယ်လော ထုတ်လိုက်တာကို တချို့ပြည်သူလူထုတွေက မသိသေးဘူး။ အများအားဖြင့် လက်လုပ်လက်စားတွေက အချင်းချင်းပြောမှသိကြတာလေ။ မနေ့က ပစ်သတ်ခံရတဲ့သူကလည်း သူ့ဝက်ခြံကနေ ကားနဲ့ပြန်လာတာကို သူ့အိမ်အရှေ့ထိ စစ်သားတွေက လိုက်လာပြီးပစ်သတ်သွားတယ်။ အနည်းဆုံးတော့ အကျိုးအကြောင်းမေးမြန်းသင့်တာပေါ့။ ပြည်သူကိုတော့ ရန်သူလိုမဆက်ဆံသင့်ပါဘူး။” ဟု လားရှိုးဒေသခံတစ်ဦးကပြောသည်။

စစ်ကောင်စီမှ လားရှိုးမြို့အပါအဝင် သျှမ်းပြည်နယ်မြောက်ပိုင်းရှိ မြို့နယ် (၈) မြို့နယ်အား မာရှယ်လော (စစ်အုပ်ချုပ်ရေး) ဥပဒေ အဖြစ် နိုဝင်ဘာလ (၁၅) ရက်က ထုတ်ပြန်သတ်မှတ်ခဲ့ခြင်းဖြစ်သည်။