ပြီးခဲ့သည့်ရက်ပိုင်းက ရေကြီးမှုကြောင့် တင်ကျန်ခဲ့တဲ့ ရွှံ့နွံများ ရှင်းလင်းလို့မပြီးခင် မိုးသည်းထန်စွာရွာသွန်းမှုကြောင့် မောက်မယ်မြို့ရှိ နမ့်ယွမ်းချောင်းရေ တစ်ဖန်ပြန်လည်မြင့်တက်ကြောင်း သိရသည်။
ယမန်နေ့ ညပိုင်းအချိန်က မိုးအဆက်မပြတ်ရွာသွန်းမှုကြောင့် တောင်ကျချောင်းရေနှင့်အတူ နမ့်ယွမ်းချောင်း ပြန်လည်မြင့်တက်ပြီး ရေကြီးရေလျှံဖြစ်ပေါ်ကြောင်း သိရသည်။
” မနေ့နေ့လည်က ရေပြန်ကျသွားလို့ဆိုပြီး အောက်ဘက်အိမ်ကို ပြန်ရွှေ့နေတုန်းပဲရှိသေးတယ်၊ ညက မိုးတောက်လျှောက်ရွာတော့ ရေထပ်ကြီးပြန်ရော၊ အခုတစ်ခေါက်ရေတက်တာက ပြီးခဲ့ရက်ကထက် ပိုများတယ်၊ ရေစီးလည်းတအားသန်တယ် ” ဟု ဒေသခံတစ်ဦးက ပြောသည်။
ရေကြီးရေလျှံမှုကြောင့် မြို့ပေါ်ရှိ မွေတော်ရပ်ကွက်၊ ဈေးတန်းရှိ အနိမ့်ပိုင်းရပ်ကွက်နှင့် နမ့်ယွမ်းချောင်းဘေးရှိ ကုန်းလမ်းရပ်ကွက်၊ ဆီဆုံရပ်ကွက်တို့မှာ ရေဝင်ရောက်မှုရှိကြောင်း ၎င်းကဆက်ပြောသည်။
ပြီးခဲ့သည့် စက်တင်ဘာလ(၁၀)ရက်နှင့် အောက်တို ဘာလ(၂)ရက်နေ့ကလည်း စံချိန်တင် ရေကြီးရေလျှံမှုဖြစ်ပေါ်ကာ မြို့တွင်း သစ်သားတံတား ၃ စင်း ရေထဲမျောပါသွားသလို တောင်သူလယ်သမားများ၏ စိုက်ခင်းများလည်း ရေလွမ်းမိုးမှုကြောင့် ပျက်စီး ဆုံးရှုံးမှု များပြားကြောင်း ဒေသခံတွေဆီက သိရပါသည်။
Photo- Facebook