မြောက်ပိုင်းမဟာမိတ်(၃)ဖွဲ့နှင့် တွေ့ဆုံဆွေးနွေးခဲ့ကြောင်း စစ်ကောင်စီပြော

လက်ရှိဖြစ်ပေါ်နေသော သျှမ်းပြည်နယ်မြောက်ပိုင်းတိုက်ပွဲနှင့်ပတ်သက်၍ စစ်ကောင်စီတပ်နှင့်မြောက်ပိုင်းမဟာမိတ် (MNDAA, TNLA, AA) ကိုယ်စားလှယ်တို့သည် တရုတ်နိုင်ငံ ကူမင်းမြို့တွင် တွေ့ဆုံဆွေးနွေးခဲ့ကြောင်း စစ်ကောင်စီ​၏ ပြောရေးဆိုခွင့်ရှိသူဗိုလ်ချုပ်ဇော်မင်းထွန်းက ပြောသည်။

တွေ့ဆုံမှုတွင် စစ်ကောင်စီအဖွဲ့ကိုယ်စား အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) မှ တက်ရောက်ခြင်းဖြစ်သည်။

စစ်ကောင်စီတပ်​၏ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက “ ကျနော်တို့ မြန်မာနိုင်ငံအမျိုးသား စည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှု ညှိနှိုင်းရေးကော်မတီက တာဝန်ရှိတဲ့လူတွေနဲ့ MNDAA- TNLA-AA အဖွဲ့က တာဝန်ရှိတဲ့သူတွေဟာ တရုတ်နိုင်ငံရဲ့ အကူအညီနဲ့ နိုင်ငံရေးအရ ဖြေရှင်းနိုင်ဖို့ တွေ့ဆုံဆွေးနွေးမှုများ ပြုလုပ်ခဲ့ပါတယ်။ ဒီဆွေးနွေးမှုအပေါ်မှာ တိုးတက်မှုအပေါ်မှာမူတည်ပြီး ဒီလကုန်ပိုင်းမှာလည်း ထပ်မံဆွေးနွေးသွားဖို့ရှိကြောင်း ပြောကြားလိုပါတယ်”ဟု ပြောသည်။

တွေ့ဆုံဆွေးနွေးမှု​၏ အသေးစိတ်အချက်အလက်ကို ၂ ဖက်အဖွဲ့မှ ထုတ်ပြန်ထားခြင်းမရှိသေးပါ။