မြန်မာတစ်နိုင်ငံလုံးတွင် စက်သုံးဆီ ပြတ်လပ်မှု အခြေ အနေဆိုးရွားမှုကြောင့် ညအိပ်စောင့်ဆိုင်းပြီး တန်းစီဝယ်ယူနေရ 

မြန်မာတစ်နိုင်ငံလုံးတွင် စက်သုံးဆီ ပြတ်လပ်မှု အခြေအနေဆိုးရွားနေပြီး ရန်ကုန်နှင့် မန္တလေးရှိ ဆီဆိုင်များရှေ့တွင် ညအိပ်စောင့်ဆိုင်းပြီး စက်သုံးဆီ တန်းစီဝယ်ယူနေရသည်အထိ ဖြစ်ပေါ်နေကြောင်း သိရှိရသည်။

အလားတူ နေပြည်တော်နှင့် မန္တလေးမှ ပြည်သူများကလည်း စက်သုံးဆီ ရရှိရန် နံနက်အစောကြီးထ၍ ဆီဆိုင်ရှေ့ တန်းစီနေရကြောင်း၊ ဆီဆိုင်များက နာရီအနည်းငယ်သာ ရောင်းချပေးပြီး ဆီကုန်သွားပြီဟု ပြောဆိုနေသည့်အတွက် ပြင်ပ မှောင်ခို ဆီဆိုင်များထံမှ ဆီဝယ်ယူသုံးစွဲနေရကြောင်း ပြောဆိုသည်။

မန္တလေးမြို့မှာတော့ အပြင်ဆိုင်မှာ ဆီ(၁)လီတာ ကို အနည်းဆုံး ကျပ် ၅၀၀၀ ကနေ ၈၀၀၀ ၊ ကျပ် ၁၀၀၀၀ လောက်အထိ ပေးဝယ်ရသည်ဟု မန္တလေးမြို့နေ ပြည်သူတစ်ဦးထံမှသိရသည်။

အလားတူ တောင်ကြီးမြို့တွင်လည်း စက်သုံးဆီများကို နေ့စဉ် တန်းစီ ဝယ်ယူနေရပြီး ဆီဆိုင်များကလည်း စက်သုံးဆီများကို နေ့စဉ် အကန့်အသတ်ဖြင့်သာ ရောင်းချနေကြကြောင်း သိရသည်။

” ဒီနေ့မနက် (ဩဂုတ်လ ၁၃ရက်) အေးသာယာမှာတော့ တန်းစီစရာမလိုဘူး၊ ဈေးတော့နည်းနည်းပိုပါမယ်၊ ပြီးတော့ လိုသလောက်ထည့်လို့ရတယ်လို့ တောင်ကြီးဒေသခံက ပြောပါသည်။

ဒီကနေ့မနက်ပိုင်းမှာ တောင်ကြီးအထွက် ကန်ကြီးရပ်ကွက် ကျောက်တလုံးလမ်းရှိ BOC မှာ တန်းစီစောင့်ဆိုင်း ဝယ်ယူနေကြကြောင်း သိရသည်။

မြို့ပေါ်ကဆီဆိုင်တွေ ဝယ်မရရင် ကရင်မရေထွက် ဘက်က ပလီလင်းရွာမှာ သွားထည့်လို့ရတယ်၊ ဈေးလည်းသက်သာသလို တန်းစီစရာမလိုဘူးလို့ ကိုယ်တိုင် သွားဝယ်ထည့်လာသူတစ်ဦးက Hsan Loi Voice ကိုပြောပါသည်။

ပြီးခဲ့သည့် ဇူလိုင်လ(၂၇)ရက်နေ့ မှစတင်ပြီး တစ်နိုင်ငံလုံးအတိုင်းအတာဖြင့် စက်သုံးဆီ ပြတ်လပ်မှု များ စတင်ဖြစ်‌ပေါ်ခဲ့ရာ ဆီပန့်ဆိုင်များတွင် နံနက်ပိုင်းသာ စက်သုံးဆီများကို အကန့်အသတ်ဖြင့်သာ ဝယ်ယူရရှိနိုင်ပြီး အများစုသော အချိန်များတွင် စက်သုံးဆီများ ပြတ်တောက်နေကြောင်း သိရှိရပါသည်။