ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်မြောက်ပိုင်း မူဆယ်မြို့နယ် စယ်လန့်ကျေးရွာတွင် ယနေ့ စက်တင်ဘာလ (၁) ရက်နေ့ နံနက် ၉ နာရီ ၁၅ မိနစ်ခန့်တွင် ဘုရားမီးပူဇော်ရာမှတဆင့် မီးလောင်ကျွမ်းမှုဖြစ်ပွားပြီး လူနေအိမ် ၂ အိမ် မီးလောင်ပြာကျခဲ့ရသည်။
စယ်လန့်ကျေးရွာ ဦးစိုင်းဆမ်ကျော်ငင်း နေအိမ်မှ ဖယောင်းတိုင်ဖြင့် ဘုရားမီးပူဇော်ရာမှ မတော်တဆမီးလောင်ကျွမ်းမှုဖြစ်ပွားကာ အနီးရှိ နောက်ထပ်နေအိမ်တစ်အိမ်ကိုပါ မီးစွဲလောင်ကျွမ်းခဲ့ခြင်းဖြစ်သည်။
“ မနက်ပိုင်း ဆွမ်းတော်တင်ရင်း ဖယောင်းတိုင်နဲ့ ဘုရားမီးထွန်းပူဇော်ရင်းကနေ မီးစလောင်တာပါ။ အဲ့ကနေတဆင့် ဘေးအိမ်တွေကိုပါ မီးကူးပြီး နောက်ထပ်အိမ်တစ်အိမ်ပြာကျသွားတယ်။ နောက်မှ TNLA နဲ့ SSPP အဖွဲ့တွေက မီးလာငြိမ်းကူလို့ မီးလောင်ပြီး ၁ နာရီလောက်အကြာမှ မီးငြိမ်းသတ်နိုင်ခဲ့တာပါ။ သူက ဘုရားမီးထွန်းပြီး ဘေးအိမ်ကိုအလည်သွားရာကနေ ဖယောင်းတိုင်မီးကုန်ပြီး မီးကူးကုန်လို့ အိမ် ၂ အိမ်ပြာကျရတာပေါ့။” ဟု စယ်လန့်ကျေးရွာက ဒေသခံ တစ်ဦးကပြောပြသည်။
မီးလောင်ကျွမ်းမှုကြောင့် နေအိမ် ၂ အိမ်အပြင် အိမ်စီးကားတစ်စီး၊ ထော်လာဂျီတစ်စီး၊ စပါးစိုက်စက် ၂ စီး၊ စပါးရိတ်စက်တစ်စီး၊ လယ်ထွန်စက် ၂ စီး၊ သုံးဘီးဆိုင်ကယ် ၁ နှင့် ဆိုင်ကယ်တစ်စီး မီးလောင်ပြာကျခဲ့ကြောင်း သတင်းရရှိသည်။
