မိုင်းပန်မြို့မှာ စစ်ကောင်စီမှ တပ်ဆင်ထားတဲ့ CCTV များ ခိုးယူခံရသည့်အပြင် အချို့နေရာများတွင် ဖျက်ဆီးခံရဟုဆို

သျှမ်းပြည်နယ်တောင်ပိုင်း၊ မိုင်းပန်မြို့ရှိ လမ်းဆုံလမ်းခွများမှာ စစ်ကောင်စီက တပ်ဆင်ထားသည့် CCTV များ ခိုးယူခံရသည့်အပြင် အချို့နေရာများတွင် ထုခွဲဖျက်ဆီးပစ် ခံရကြောင်း သိရသည်။

ပြီးခဲ့သည့်ရက်ပိုင်းက လူစည်ကားရာနေရာနှင့်မြို့ဝင်မြို့ထွက်နေရာမှာ တပ်ဆင်ထားသည့် CCTV များ ဖျက်ဆီးခံခဲ့ရကြောင်း ဒေသခံများထံမှ သိရသည်။

“မွေတော်ကျောင်းလမ်းဆုံနားမှာ တပ်ထားတဲ့ CCTV က မိုးပေါ်ကို ထောင်ပြီး လှည့်ပစ်တယ် သူ့အောက်က စက်ကိုတော့ ထုခွဲဖျက်ဆီးပစ်တာတွေ့ရတယ်ပေါ့၊ နတ်စင်နား (စဝ်မှိုင်းလုံ) နားမှာဆို CCTV နဲ့ ဆက်စပ်တဲ့ဟာ အကုန်ဖြုတ်ယူသွားတယ်၊ ဘာမှမကျန်ဘူး” လို့ ဒေသခံတစ်ဦးက Hsan Loi Voice ကို ပြောသည်။

မိုင်းပန်မြို့မှ CCTV သည် (၃၈)လုံးရှိပြီး နေရာ (၈)နေရာမှာ တပ်ဆင်ထားကာ ယခု ခိုးယူဖျက်ဆီးခံရသည့် နေရာမှအပ အခြားနေရာများကိုတော့ ဖျက်ဆီးခြင်း မရှိဘူးလို့ သိရပါသည်။

ပျောက်ဆုံးသွားသော CCTV များကို ထွေ/အုပ်နှင့် လုံခြုံရေး တာဝန်ရှိသူများက လိုက်လံရှာဖွေ နေကြောင်း သိရသည်။

မူးယစ်ဆေးဝါးရောင်းဝယ် သုံးစွဲသူများ ခြေရာခံဖမ်းဆီးဖို့ဆိုသည့် အကြောင်းပြပြီး အင်အား လျှော့နည်းလာသည့် စစ်ကောင်စီက တော်လှန်ရေးတပ်ဖွဲ့များ၏ မြို့အဝင်အထွက် စောင့်ကြည့်နိုင်ဖို့ စီမံချက်ချကာ သျှမ်းပြည်နယ်အတွင်းရှိ မြို့နယ်တိုင်းတွင် CCTV များ လိုက်လံတပ်ဆင်ထားကြောင်း သိရပါသည်။