ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်အရှေ့ပိုင်း၊ မိုင်းဆတ်မြို့ဝင် နမ့်ခုတ် ချောင်းကူး ဆိုက်ခေါင်ယာယီဘေလီတံတားသည် အောက်တိုဘာလ(၁၇)ရက် နံနက်(၁၁)နာရီခွဲခန့် အချိန်တွင် ကျိုးကျပျက်စီးသွားကြောင်း သိရသည်။
အဆိုပါ တံတားသည် တောင်ကြီး- မိုင်းဆတ် – တာချီလိတ် သွားလမ်းပေါ်မှာတည်ရှိပြီး ပြီးခဲ့သည့် စက်တင်ဘာလ(၁၀)ရက်နေ့က မိုးသည်ထန်စွာ ရွာသွန်းပြီး နမ့်ခုတ်ချောင်း ရေကြီးရေလျှံဖြစ်ပေါ်မှုကြောင့် ဆိုက်ခေါင် RC ကွန်ကရစ်တံတား ပျက်စီးသွားကာ ယာယီဘေလီတံတား ပြန်လည်တည်ဆောက် ထားတာဖြစ်ပါသည်။
ယာယီဘေလီတံတား ပြန်လည်တည်ဆောက်လို့ မပြီး သေးခင်မှာ ကျိုးကျပျက်စီးသွားကြောင်း ဒေသခံများထံမှသိရသည်။
“ အခုယာယီတံတားကို ပြီးခဲ့တဲ့လ ၂၇ ရက်က စဆောက် တာ၊ ပြည်သူတွေ သွားလာအဆင်ပြေဖို့ တည်ဆောက်ရေးသမားလည်း ကြိုးစားလုပ်ပေးနေတာ၊ ဆောက်လို့ပြီးခါနီးကျမှ ပြန်ပျက်ကျသွားတယ်” လို့ မိုင်းဆတ် ဒေသခံကပြောသည်။
ဆိုက်ခေါင်တံတား ကျိုးကျပျက်စီးမှုကြောင့် နမ့်ခုတ်ချောင်းကို ဒေသခံပြည်သူများက စက်လှေဖြင့် ဖြတ်ကူးသွားလာနေရပြီး ကုန်စည်စီးဆင်းမှုအတွက် အခက်အခဲဖြစ်ကြောင်း သိရှိရပါသည်။
