ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
စစ်ကောင်စီတပ်နှင့် တော်လှန်ရေးတပ်များ၏ တိုက်ပွဲကြောင့် သျှမ်းပြည်နယ်မြောက်ပိုင်းတွင် လမ်းပန်းဆက်သွယ်ရေးအပြင် ဖုန်းလိုင်းနှင့်အင်တာနက်လိုင်း ပြတ်တောက်လျက်ရှိသည်။ မြောက်ပိုင်းမဟာမိတ်အဖွဲ့နှင့် တော်လှန်ရေးအင်အားစုများ သိမ်းပိုက်ထားသော မြို့နယ်တော်တော်များများတွင် တိုက်ပွဲဖြစ်ပွားမှုများ ရပ်တန့်နေပြီဖြစ်သော်လည်း စစ်ကောင်စီတပ်၏ မကြာခဏ လေကြောင်းတိုက်ခိုက်မှု ခံနေရဆဲဖြစ်သည်။
“ သျှမ်းမြောက် တစ်ကြောလုံးတော့ ဘာဖုန်းလိုင်း ဘာအင်တာနက်လိုင်းမှ မရတော့ဘူး။ တိုက်ပွဲကတော့ မဖြစ်တော့ဘူးဆိုပေမယ့် စစ်ကောင်စီဘက်ကနေ မကြာမကြာ လေယာဉ်နဲ့ဗုံးလာကြဲနေတာတွေရှိတယ်။ မြို့ခံတော်တော်များများကတော့ မြို့ထဲကိုပြန်ဝင်လာနေကြပါပြီ။ ဖုန်းလိုင်း အင်တာနက်လိုင်းတွေမရှိတော့ Starlink အင်တာနက်လိုင်းကို အသုံးပြုပြီး လိုင်းသုံးရတယ်။ ကျောက်မဲမြို့ထဲမှာတော့ Starlink တပ်ဆင်မှုကို TNLA က ပိတ်ထားတယ်။ မြို့ပြင်ကျေးရွာတွေမှာတော့ Starlink WiFi ကို အင်တာနက် ကဖေး လိုမျိုး အသုံးပြုနေတယ်။ စက်တစ်လုံးရဲ့ တန်ဖိုးက သိန်း (၁၆၀) အထိပေါက်ဈေးရှိတယ်။ အင်တာနက်သွားသုံးရင် တစ်နာရီ (၃၀၀၀) ကျပ်ပေးရပါတယ်။” ဟု ကျောက်မဲမြို့ခံတစ်ဦးက ပြောသည်။
Starlink WiFi စက်အား TNLA အဖွဲ့နှင့် နီးစပ်သူများထံမှ ဝယ်ယူရရှိနေခြင်းဖြစ်သော်လည်း မြို့ထဲတွင် တပ်ဆင်ခွင့်ပိတ်ထားသည်ဟုဆိုသည်။
လက်ရှိတွင် သျှမ်းပြည်နယ်မြောက်ပိုင်း နောင်ချိုမြို့နယ်အတွင်း TNLA နှင့် စစ်ကောင်တပ်တို့ တိုက်ပွဲဆက်လက်ပြင်းထန်နေပြီး တိုက်ပွဲများငြိမ်သက်နေသော သျှမ်းပြည်နယ်မြောက်ပိုင်းဆီသို့ တိုက်ပွဲပြန်လည်ရောက်ရှိလာမည်ကို ဒေသခံများက စိုးရိမ်လျက်ရှိသည်။
