ပုံးအင်းဒေသတစ်ခုလုံး တစ်နှစ်အတွင်း (၃)ကြိမ်မြောက် ရေမြင့်တက်လာမှုကြောင့် ရွာတိုင်းနီးပါး ရေဘေးဒုက္ခကြုံတွေ့နေရပြီး အရေးပေါ်အကူအညီလိုအပ်နေ

သျှမ်းပြည်နယ်တောင်ပိုင်း နာမည်ကျော် နောင်မွန်ဆန်ထွက်ရှိရာဒေသဖြစ်တဲ့ ပုံးအင်းဒေသ၌ တစ်နှစ်အတွင်း (၃)ကြိမ်တိုင်တိုင် ရေမြင့်တက်မှုကြောင့် ပုံးအင်းဒေသတစ်ခုလုံးရှိ လူနေအိမ်များ ရေနစ်မြုပ်ကာ လူနေလို့မရတော့သည့် အခြေအနေသို့‌ ရောက်ရှိနေပြီဖြစ်ကြောင်း သိရသည်။

“ဆန်၊ စပါး ထွက်ရှိတဲ့ ဒေသတစ်ခုမှာ အခုတော့ စားစရာဆန်ပါ မရှိတော့တဲ့ အခြေအနေနဲ့ ရင်ဆိုင်နေရပါတယ်။ ကူညီထောက်ပံ့ကယ်ဆယ်ရေးအဖွဲ့တွေလည်း သွားရောက်လှူဒါန်းတာတွေမရှိသေးဘူးလို့ကြားတယ်။ တောင်ကြီးက လူမှုကူညီရေးအသင်းအဖွဲ့တွေကတော့ ပုံးအင်းဒေသ ရေဘေးဒုက္ခသည်တွေကို ကူညီထောက်ပံ့ပေးနိုင်ဖို့အတွက် အလှူခံနေပါပြီ။”ဟု တောင်ကြီးမြို့သို့ ရောက်ရှိနေသော ပုံးအင်းဒေသခံတစ်ဦးက ပြောပြသည်။

ပုံးအင်းဒေသသည် သျှမ်းပြည်နယ်တောင်ပိုင်း ဆီဆိုင်မြို့နယ် သျှမ်းလူမျိုးအများဆုံးနေထိုင်ရာ ဒေသတစ်ခုဖြစ်သည်။