ပင်လောင်းမြို့နယ် ပင်ပုံရွာဘုန်းကြီးကျောင်း စစ်ကောင်စီ၏ လေကြောင်းတိုက်ခိုက်ခြင်းခံရပြီး ပျက်စီး

သျှမ်းပြည်နယ်တောင်ပိုင်း ပင်လောင်းမြို့နယ် ပင်ပုံကျေးရွာ၏ ဘုန်းကြီးကျောင်းအား ဧပြီလ (၂) ရက်နေ့က စစ်ကောင်စီမှ လေယာဉ်ဖြင့် ဗုံးကြဲတိုက်ခိုက်မှုပြုလုပ်ခဲ့သည်။

ဗုံးကြဲတိုက်ခိုက်ခံရခြင်းကြောင့် ဘုန်းကြီးကျောင်းအဆောက်အအုံတစ်ခုလုံး ထိခိုက်ပျက်စီးခဲ့ရသည်။

“ ပင်လောင်းဘက်မှာ တိုက်ပွဲမဖြစ်တာ တစ်ပတ်ကျော်လောက်တောင်ရှိနေပြီ။ တော်လှန်ရေးအဖွဲ့တွေလည်း ပြန်ဆုတ်သွားတယ်လို့ကြားတယ်။ ဒီလိုအချိန်မှာ ရုတ်တရက်ဘုန်းကြီးကျောင်းကို ဗုံးကြဲတိုက်ခိုက်တာကတော့ တမင်ရည်ရွယ်ချက်ရှိရှိပြုလုပ်တာပါပဲ။ တော်သေးတာပေါ့ ကျောင်းထဲမှာ ဘုန်းကြီးတွေရော လူတွေရောမရှိတော့ လူအထိအခိုက်မရှိဘူးပေါ့။” ဟု ပင်လောင်းမြို့နယ် ဒေသခံတစ်ဦးကပြောသည်။

သျှမ်းပြည်နယ်တောင်ပိုင်း ပင်လောင်းမြို့နယ် ပင်ပုံကျေးရွာတွင် တပ်စွဲထားသော စစ်ကောင်စီတပ်နှင့် PNA အဖွဲ့အား တော်လှန်ရေးအင်အားစုများဖြစ်သော PNLA+PDF တို့က လွန်ခဲ့သည့်အပတ်က ဝင်ရောက်တိုက်ခိုက်ခဲ့သည်ဟု သိရသည်။