ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
ယမန်နေ့ (၂၁.၄.၂၀၂၃) ရက်နေ့ ည (၇) နာရီဝန်းကျင်ခန့်၌ နေပြည်တော် လယ်ဝေးမြို့နယ်အတွင်း လေပြင်းတိုက်ခတ်မှုကြောင့် ရွှေဟင်္သာကျေးရွာအုပ်စု တံတားဦးကျေးရွာနှင့် ကံသာကျေးရွာအုပ်စု အောင်မြင်ကုန်းကျေးရွာရှိ လူနေအိမ်များ ပျက်စီးဆုံးရှုံးခဲ့သည်ဟု သိရသည်။
လေပြင်းတိုက်ခတ်မှုကြောင့် ကျေးရွာ(၂)ရွာရှိ လူနေအိမ် (၂၀၀) ကျော် ပျက်စီးခဲ့သလို စေတီပုထိုးများလည်း ပျက်စီးခဲ့သည်ဟု ဆိုသည်။ ဒါ့အပြင် တံတားဦးကျေးရွာမှ အမျိုးသမီး(၂)ဦးနှင့် အောင်မြင်ကုန်းကျေးရွာမှ အမျိုးသား(၂)ဦးနှင့်အမျိုးသမီး(၂)ဦး အသက်ဆုံးရှုံးခဲ့ရသည်။
“ဖြစ်ဖြစ်ခြင်းပဲ ကျနော်တို့လူငယ်တွေ အောင်မြင်ကုန်းကျေးရွာဘက်ကို ဆိုင်ကယ်နဲ့ရအောင် သွားကြည့်ဖြစ်တယ်။ လူနေအိမ်အကုန်လုံးနီးပါး လေထဲပါသွားကုန်တယ်။ ထိခိုက်ဒဏ်ရာရတဲ့သူတွေကို ကူညီနိုင်သလောက်ကူညီပေးပြီးတော့ ကျနော်တို့သိတဲ့ ပရဟိတ အသင်းတွေကို ဖုန်းဆက်ပြီး ထိခိုက်ဒဏ်ရာရတဲ့သူတွေကို လာရောက်ကူညီပေးဖို့ ချက်ချင်းအကြောင်းကြားပေးခဲ့ပါတယ်။ လေကတော်တော်ပြင်းတော့ လူနေအိမ်တွေရော၊ တဲတွေရော အကုန်လုံးပျက်စီးကုန်တာ။ တချို့လူတွေတော့ အိမ်ပြိုပြီး အိမ်အောက်မှာပိမိပြီး သေသွားတာတွေရှိတယ်။ ဒီမနက်လည်း ထပ်ပြီး သွားခဲ့သေးတယ် ဒီမနက်တော့ လူမှုကူညီရေး အသင်းအဖွဲ့တော်တော်များများ လာရောက်ကူညီပေးနေပါတယ်။” ဟု နေပြည်တော်ရှိ အောင်းကုန်းကျေးရွာမှ ဒေသခံတစ်ဦးက Hsan Loi Voice ကို ပြောပြသည်။
လေပြင်းတိုက်ခတ်မှုကြောင့် ကျေးရွာ(၂)ရွာမှ ထိခိုက်ဒဏ်ရာရရှိသူ (၁၀၀)ဦးကျော်ရှိပြီး အချို့ထိခိုက်သူများသည် စိုးရိမ်ဒဏ်ရာများ ရရှိထားသည်ဟု ဆိုသည်။
ယမန်နေ့ညက လေပြင်းတိုက်ခတ်မှုကြောင့် မန္တလေးတိုင်းဒေသအတွင်းရှိ မြို့နယ်အချို့၌ နေအိမ်နှင့် အဆောက်အအုံများ ထိခိုက်ပျက်စီးခဲ့ရကြောင်း သတင်းရရှိသည်။
