နမ့်ဆန်မြို့တွင် စစ်ကောင်စီတပ်က လေကြောင်းဗုံးကြဲတိုက်ခိုက်မှုကြောင့် အရပ်သား(၁)ဦးသေဆုံးပြီး နေအိမ်အဆောက်အဦးများ ထိခိုက်ပျက်စီ

သျှမ်းပြည်မြောက်ပိုင်း၊ နမ့်ဆန်မြို့နယ်တွင် ယမန်နေ့ သြဂုတ်လ (၁၂)ရက်နေ့ ညအချိန်တွင် စစ်ကောင်စီတပ်က လေကြောင်းဗုံးကြဲတိုက်ခိုက်မှု‌ကြောင့် အရပ်သား(၁)ဦးသေဆုံးပြီး နေအိမ်အဆောက်အဦးများ ထိခိုက်ပျက်စီးကြောင်း သိရသည်။

စစ်ကောင်စီက (၃)ကြိမ်လာရောက် ဗုံးကြဲတိုက်ခိုက်မှုကြောင့် နမ့်ဆန်မြို့၊ မြို့လယ်ရပ်ကွက်ရှိ EPC ရုံးအတွင်းသို့ ကျရောက်ပေါက်ကွဲခဲ့ပြီး ထိုရုံးဝန်းရှိ အသက်(၃၀) အရွယ် ဒေသခံ(၁)ဦး သေဆုံးသွားကာ (၁)ဦးထိခိုက်ဒဏ်ရာရရှိခဲ့သည်ဟု PSLF/TNLA က သတင်းထုတ်ပြန်ထားပါသည်။

EPC ရုံးဝန်းအတွင်းရှိ ထရန်စဖော်မာစက်များထိခိုက်ပျက်စီးသွားပြီး ထိုအနီးဝန်းကျင်ရှိ မြို့မဂိုဏ်းချုပ်ကျောင်းနှင့် ဒေသခံနေအိမ်အဆောက်အဦး(၅)လုံးလည်း ထိခိုက်ပျက်စီးသွားခဲ့ကြောင်း ထုတ်ပြန်ထားပါသည်။

ပြီးခဲ့သည့် သြဂုတ်လ(၆)ရက်နေ့ကလည်း တိုက်ပွဲဖြစ်ပွားခြင်းမရှိဘဲ သျှမ်းပြည်မြောက်ပိုင်း၊ ကွတ်ခိုင်မြို့အား စစ်ကောင်စီတပ်က လေကြောင်းဗုံးကြဲတိုက်ခိုက်မှုပြုလုပ်ခဲ့ပြီး ဒေသခံ(၆)ဦး သေဆုံးကာ၊ (၁၀)ဦး ထိခိုက်ဒဏ်ရာရရှိခဲ့ပြီး လူနေအိမ်နှင့် ဆိုင်ခန်းပေါင်း(၄၀၀) ကျော် လည်း မီးလောင်ပျက်စီးသွားခဲ့ကြောင်း သိရှိရပါသည်။