ဓာတ်မြေဩဇာ တစ်အိတ်(၁၃၀,၀၀၀)ကျပ်အထိရှိသော်လည်း (၂၀၂၃-၂၀၂၄)ကြံရာသီအတွက် စက်ရုံအရောက်ကြံတစ်တန်လျှင် (၁၁၀,၀၀၀)ကျပ်သာ ရရှိသောကြောင့် ကြံစိုက်တောင်သူဦးကြီးများ ငြီးတွား

သျှမ်းပြည်နယ်တွင် ထွက်ရှိသော ကြံများကို အဓိကဝယ်ယူလျက်ရှိသည့် ငွေရည်ပုလဲသကြားကုမ္ပဏီလီမိတက်သည် ဩဂုတ်လ(၁)ရက်နေ့ ၂၀၂၃-၂၀၂၄ ကြံရာသီအတွက် ကြံတစ်တန်လျှင် စက်ရုံအရောက်(၁၁၀,၀၀၀)ကျပ်ဖြင့် ဝယ်ယူမည်ဟု ထုတ်ပြန်သတ်မှတ်ခဲ့သည်။ ယခင်နှစ်က ကြံတစ်တန်လျှင် (၉၅၀၀၀) ကျပ်ဖြင့်သာ ဝယ်ယူခဲ့သော်လည်း ယခုနှစ်တွင် ကြံတစ်တန်လျှင် (၁၁၀,၀၀၀) ကျပ်အထိ တိုးမြှင့်ခဲ့ခြင်းဖြစ်သည်။

သို့သော် ယခုနှစ်တွင် ကုန်စေ◌ျးနှုန်းအဆမတန်မြှင့်မားလာမှုကြောင့် ကြံစိုက်ပျိုးရာတွင် အသုံးပြုသော ဓာတ်မြေဩဇာတစ်အိတ်၏ တန်ဖိုးသည် (၁၃၀,၀၀၀)ကျပ်ရှိသည်ဟုဆိုသည်။

“အခုနှစ်က ကုန်စေ◌ျးနှုန်းတွေလည်း အဆမတန်မြင့်တက်လို့ ကြံခင်းထဲထည့်ဖို့အတွက် မြေဩဇာဖိုးကိုပဲ တစ်အိတ်ကိုတစ်သိန်းသုံးသောင်းလောက်ပေးဝယ်ရတယ်။ ဒါက မြေဩဇာဖိုးပဲရှိသေးတယ် လူငှားခ၊ ပေါင်းနုတ်ခ၊ ဆေးဖျန်းခတွေမပါသေးဘူး။ ကြံပေါ်ရင်လည်း ကားခနဲ့လူငှားခက ကြံဖိုးရဲ့တစ်ဝက်လောက်ပေးနေရတယ်။ အခုလို ငွေရည်ပုလဲဘက်က တစ်တန်ကို တစ်သိန်းတစ်သောင်းကျပ်တိုးပေးတာတော့ ကျေးဇူးတင်ပါတယ်။ ဒါပေမယ့် တကယ်တမ်းအခုငွေစေ◌ျးနဲ့ပြန်တွက်တော့ ကြံအထွက်ကောင်းမှပဲ ကျန်မယ့်သဘောရှိတယ်။ ကျနော်တို့မှန်းထားတာက တစ်တန်ကိုတစ်သိန်းခွဲရမှပဲ ကြံစိုက်တဲ့သူတွေအတွက် အဆင်ပြေနိုင်လောက်မှာဗျ။” ဟု ကျောက်မဲမြို့နယ်အတွင်း ကြံစိုက်တောင်သူတစ်ဦးက ပြောပြသည်။

ငွေရည်ပုလဲကုမ္ပဏီအနေဖြင့် ကြံစိုက်တောင်သူများအတွက် ကြံစိုက်ဧကကိုတွက်ချက်ပြီး အတိုးမဲ့စနစ်ဖြင့် ငွေကြိုထုတ်ချေးပေးလျက်ရှိပြီး ကြံပေါ်ချိန်ရောက်မှ ပြန်လည်နုတ်ယူခြင်းဖြစ်သည်။