ထိုင်းနယ်စပ်ကဝင်လာသည့် အထောက်အထားမဲ့ တရုတ်လူမျိုးများကို ထိုင်းနယ်စပ်လုံခြုံရေးအဖွဲ့က အဆက်မပြတ် ဖမ်းဆီး

၂၀၂၃ ခု၊ ဇူလိူင်လ ၂၂ ရက်နေ့ မွန်းလွဲပိုင်း ၁ နာရီခွဲခန့်က ချင်းရိုင်းခရိုင်၊ ချင်းခေါင် ရိမ်းခုံ ၅ ရပ်ကွက်ရှိ ဘန့်ဆောင်ဖိနှောင့် လိမ္မော်ခြံတဝိုက်၊ လာအိုဖက်ခြမ်းမှ အထောက်အထားမဲ့ ဝင်ရောက်လာသည့် တရုတ်လူမျိုး ၄ ဦးကို ထိုင်းနယ်စပ်လုံခြုံရေးအဖွဲ့များက ဖမ်းဆီးခဲ့သည်ဟု သိရသည်။

အဖမ်းခံရသူများမှာ Mr. Yan Gxi (၂၇ နှစ်)၊ Mr. Son Xin Oliei (၂၉ နှစ်)၊ Mr. Wang Tao (၃၈ နှစ်) နှင့် Mr. Liang Zih Toong (၃၀ နှစ်) တို့ဖြစ်သည်ဟု သိရသည်။

လာအိုစက်လှေများကို တစီးလျှင် ယွမ်ငွေ ၅ ထောင်ဖြင့် ဌားရမ်းအသုံးပြုပြီး ထိုင်းနိုင်ငံ ဘန်ကောက်သို့ သွားရန်ဖြစ်သည့် အစုအဖွဲ့များဖြစ်သည်။ ဘန်ကောက်၌ ၎င်းတို့၏ ဆွေမျိုးများ ရှိသည်ဟုလည်း ပြောပါသည်။

မကြာသေးမီက နယ်စပ်ဖြတ်ကျော်သည့်မှုခင်းတားဆီး နှိမ်နှင်းရေးကိစ္စများ၊ Call Center ဂိုဏ်းများ နှိမ်နှင်းရေးကိစ္စ၊ အင်တာနက်ဖြတ်တောက်ရေးကိစ္စများ၊ မူးယစ်ဆေးဝါးနှင့် လူကုန်ကူးမှုတားဆီးနှိမ်နှင်းရေးကိစ္စများကို မဲခေါင်ဒေသတွင်း ပူးပေါင်းဆောင်ရွက်နိုင်ရေး တရုတ်-မြန်မာ-ထိုင်း ၃ ပွင့်ဆိုင် အစည်းအဝေးကျင်းပပြုလုပ်ခဲ့သည်။

Ref: maesaipress