ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်မြောက်ပိုင်း နောင်ချိုမြို့နယ် တောင်ခမ်းကျေးရွာအနီးတွင် စစ်ကောင်စီတပ်နှင့် TNLA + တော်လှန်ရေးအင်အားစုများ ယနေ့ (၂၄.၁၀.၂၀၂၄) ရက်နေ့ နံနက်ပိုင်းအထိ တိုက်ပွဲဆက်လက်ဖြစ်ပွားလျက်ရှိကြောင်း သိရသည်။
စစ်ကောင်စီဘက်က ၎င်းတို့၏ တပ်စခန်းများမကျရေးအတွက် တိုက်လေယာဉ်ဖြင့် အကြိမ်ကြိမ် ရမ်းသမ်းဗုံးကြဲချနေသည်။
“ သီပေါကျသွားတော့ တော်လှန်ရေးအဖွဲ့တွေဘက်က တောင်ခမ်းဘက်ကို ဦးတည်လာနေတယ်ဆိုပြီး စစ်တပ်ဘက်က လေကြောင်းပစ်ကူတွေနဲ့ သူတို့တပ်စခန်းကို ခုခံကာကွယ်နေတယ်။ ပြီးတော့ နောင်ချိုမြို့ပေါ်ကိုလည်း ခဏခဏ ဗုံးလာကြဲလို့ ပြည်သူအိမ်တွေ အများကြီးပျက်စီးနေတယ်။” ဟု ကျောက်ဂူတိုက်နယ်ကို ရောက်ရှိတိမ်းရှောင်နေသော နောင်ချိုဒေသခံတစ်ဦးက ပြောပြသည်။
လက်ရှိတွင် နောင်ချို-ကျောက်ဂူ ကားလမ်းမကြီးတစ်လျောက် စစ်ကောင်စီ၏ တပ်ဖွဲ့ဝင်များက ကင်းပုန်းများစွာချထားပြီး ခရီးသွားများထံလည်း အမျိုးမျိုး ငွေညစ်တောင်းခံလျက်ရှိဟု ခရီးသည်တင်ယာဉ်မောင်းတစ်ဦးထံ သိရသည်။
“ ကျောက်ဂူကနေ ဆင်းလာရင် ဒုဋ္ဌဝတီတံတားမရောက်ခင်အထိကို စစ်ကောင်စီတပ်သား ၄-၅ ယောက်လောက်ရှိတဲ့ ကင်းပုန်းအဖွဲ့တွေ ၁၀ ဖွဲ့ကျော်လောက်က လမ်းတစ်လျောက်လုံးစောင့်နေတယ်။ ဖြတ်သွားဖြတ်လာသမျှကားတွေကိုတားပြီးတော့ စစ်တယ်။ ဘာမှမတွေ့လည်း တစ်နေရာကိုအနည်းဆုံး ၃၀၀၀ လောက်တော့ပေးရတာပဲ။” ဟု ခရီးသွားတစ်ဦးက ပြောပြသည်။
ကျောက်ဂူလမ်းမကြီးပေါ်တွင် စစ်ကောင်စီအဖွဲ့အပြင် SSPP အဖွဲ့လည်း နေရာယူထားသော ကားလမ်းကြီးဖြစ်သည်။
