တောင်ကြီးမြို့ ဝေဠုဝန်ကျောင်းထိုင်ဆရာတော်မှ ဦးဆောင်ပြီး အင်းလေးဒေသ ရေဘေးသင့်ဒေသခံများအား သွားရောက်ကူညီထောက်ပံ့

သျှမ်းပြည်နယ်တောင်ပိုင်း ညောင်ရွှေမြို့နယ် အင်းလေးဒေသအတွင်း ရေမြင့်တက်မှုကြောင့် ရေဘေးဒုက္ခကြုံတွေ့နေရသော ဒေသခံပြည်သူများအား တောင်ကြီးမြို့ ဝေဠုဝန်ကျောင်းထိုင်ဆရာတော် မှ ဦးဆောင်ပြီး လွိုင်ကော် ဗုဗ္ဗာရုံကျောင်းများ ဆရာတော်၊ သျှမ်းပြည်ဗုဒ္ဓတက္ကသိုလ်မှ သံဃာတော်များ၊ တောင်ကြီး သျှမ်းစာပေနှင့်ယဉ်ကျေးမှုအဖွဲ့ဝင်များ၊ လွယ်လုံပရဟိတကျောင်းမှ အဖွဲ့ဝင်များ၊တောင်ကြီးသျှမ်းလူငယ်များ၊ TYO အဖွဲ့၊ တောင်ကြီးဆက်ဆံရေးရုံး (RCSS) တာဝန်ခံနှင့်အဖွဲ့ဝင်များနှင့် ဒေသခံလူမှုကူညီရေး အသင်းအဖွဲ့များက လိုအပ်သော စားနှပ်ရိက္ခာများ သွားရောက်ကူညီထောက်ပံ့ပေးခဲ့ကြောင်း သိရသည်။

တောင်ကြီးမြို့ ဝေဠုဝန်ကျောင်းထိုင်ဆရာတော် နှင့်အဖွဲ့ဝင်စေတနာရှင်များစုပေါင်းပြီး စက်တင်ဘာလ (၂၁) ရက်နေ့၌ ညောင်ရွှေမြို့နယ် အင်းလေးဒေသက နမ့်ဟူးရွာ၊တောင်ပို့နီရွာ၊စန့်ခမ်းရွာ၊ကျိုင်းခမ်းမြောက်ရွာရှိ ဒေသခံ ရေဘေးသင့်ပြည်သူများအတွက် ထပ်မံထောက်ပံ့ကူညီခဲ့သည်။

“ အချို့တွေက စစ်ဘေးရှောင်ရင်း အခုဆိုရင် ရေဘေးပါထပ်ရှောင်ရတဲ့အဖြစ်မျိုးဆိုတော့ တတ်နိုင်တဲ့ဘက်ကနေ ဝေဋုဝန်ဆရာတော်က ဦးဆောင်ပြီး သွားလှူပေးဖြစ်ခဲ့တာပေါ့။ တစ်အိမ်ထောင်စုကို စားနှပ်ရိက္ခာနဲ့အကူပစ္စည်း ၁၇ မျိုးပါအိတ်ပေးခဲ့ပြီး စုစုပေါင်း (၃၁၇) အိတ် ထောက်ပံ့ကူညီပေးခဲ့ပါတယ်။” ဟု တောင်ကြီးမြို့ သျှမ်းစာပေနှင့်ယဉ်ကျေးမှုအဖွဲ့ဝင်တစ်ဦးက ပြောပြသည်။

ယနေ့စက်တင်ဘာလ (၂၂) ရက်နေ့တွင်လည်း တောင်ကြီးမြို့ ဝေဠုဝန်ကျောင်းထိုင်ဆရာတော်မှ ဦးဆောင်ပြီး ပုံးအင်းဒေသ ရေဘေးသင့်ပြည်သူများအား သွားရောက်ကူညီပေးလျက်ရှိကြောင်း သတင်းရရှိသည်။