တောင်ကြီးတွင် ကိုဗစ်ကူးစက်မှု ရှိသည်ဟု ဆိုကာ unplugged ဘား နှင့် DJ ကလပ်များ ရက်အကန့် အသတ်မရှိ ပိတ်ခိုင်းထား

 

သျှမ်းပြည်နယ် မြို့တော် တောင်ကြီးတွင် ပြီးခဲ့သည့် မေလ ၅ ရက်နေ့မှ စတင်ကာ မြို့တွင်းကိုဗစ်ပိုးကူးစက်မှုရှိသည်ဟု ဆိုကာ စစ်ကောင်စီက unplugged ဘား နှင့် DJ ကလပ်များ ရက်အကန့် အသတ်မရှိ ပိတ်ခိုင်းထားကြောင်း ဘားဆိုင်ပိုင်ရှင်တစ်ချို့ထံမှ သိရသည် ။

 

” သောကြာ နေ့ကတည်းက ပိတ်လိုက်ရတာပဲ စာထွက်ထားတယ်လေ မပိတ်လို့မရဘူး ၊ရက်အကန့်အသတ်မရှိ လို့ တော့ စာထဲပါတယ်၊ တကယ်က ကို ဗစ်ကိုကြောင်း ပြလိုက်တာပေါ့ အဓိကကသူတို့တွေထဲ ပြန် ကြားတာက VIP ခရီးစဥ်တွေ ရှိနေလို့ပေါ့ ” ဟု ဘားဆိုင်ပိုင်ရှင်တစ်ဦးကပြောသည် ။

 

စစ်ကောင်စီက unplugged ဘား နှင့် DJ ကလပ်များ ရက်အကန့် အသတ်မရှိ ပိတ်ခိုင်းထားသော် လည်း KTVဆိုင်များမပါရှိကြောင်း မင်္ဂလာဦး ရက်ကွက်နေ တောင်ကြီး မြို့ခံတစ်ဦးကပြောသည် ။

 

” KTV တွေ မပိတ်ပါဘူး ၊ နေ့ခင်းဖက်မှာတောင် K Boss မှာ ကားတွေ ဆိုင်ကယ်တွေ အပြည့်ပဲ ၊ VIP လမ်း ကြောင်းရှိလို့ ပိတ်ခိုင်းတယ်လို့ပဲမြင်တယ် ၊ သူတို့ခေတ်ဆိုတော့ သူတို့ပိတ်ချင်ပိတ် ဖွင့်ချင်ဖွင့်လုပ်နေတာပေါ့ ဒါပေမဲ့ ” ဟု ၄င်းကပြောသည် ။

 

တောင်ကြီးမြို့လည်တွင်ဖွင့်လှစ်ထားသော KBZ ဘဏ်ဥက္ကဌ ဦးအောင်ကိုဝင်းပိုင်ဆိုင်သည့် Jasmine Taunggyi hotel တွင်ဖွင့်လှစ်ထားသည့် unplugged ဘားမှာ ပိတ်ထားခြင်းမရှိကြောင်းသိရသည် ။

 

ပြီးခဲ့သည့် လပိုင်းကလည်းတောင်ကြီး highfight ဘားတွင် စစ်ကောင်စီလက်အောက်ခံ ရဲတပ်ဖွဲ့များမှ အင်အားအများအပြားဖြင့် ဝင်ရောက်ရှာဖွေမှုများပြုလုပ်ခဲ့သေးကြောင်း မျက်မြင် မြို့ခံတစ်ဦးကပြောသည် ။

 

” မူးယစ်ဆေးဝါး ဖမ်းတာလိုလို ၊ လူလာရှာတာလိုလိုနဲ့ အခန်းတိုင်းဝင်စစ်တာ နေရာတကာပါပဲ သူတို့မထင်ရင်မထင်သလို ဝင်စစ်တာပဲ ” ဟု ဆိုသည် ။

 

စစ်ကောင်စီကျန်းမာရေး ဝန်ကြီးဌာန ၏ မေလအတွင်းနောက်ဆုံးထုတ်ပြန်ချက်များအရ COVID-19 ဓာတ်ခွဲအတည်ပြုလူနာ (၁၅၅) ဦး၏ မြို့နယ်အလိုက် တွေ့ရှိရမှု အခြေအနေ များထဲတွင် သျှမ်းပြည်နယ် တောင်ကြီး မြို့တွင် ကိုဗစ်ပိုးကူးစက်ခံရသူတစ်ဦး သာ ရှိကြောင်းထုတ်ပြန်ထားသည် ။

 

အာဏာသိမ်းပြီးနောက် ယခုနှစ်အတွင်း တောင်ကြီးမြို့ပေါ်တွင် unplugged ဘားဆိုင်များ ၁၀ ခုထက်မနည်း ဖွင့်လှစ်လာပြီး DJ ကလပ် ၂ ခုဖွင့်လှစ်လာကြောင်း မြို့ခံများထံမှ သိရသည် ။

 

Photo – တောင်ကြီးမြို့ပေါ်ရှိ unplugged ဘား ဆိုင်တစ်ချို့ မြင်ကွင်း ။