၂၀၂၄ ခုနှစ် စက်တင်ဘာလ(၄)ရက်နေ့ ညနေ(၄း၀၀)နာရီခန့်တွင် သျှမ်းပြည်နယ်တောင်ပိုင်း အောင်ပန်းမြို့အနီး ထီသိမ်တောင်ရွာတွင် နေထိုင်သော အမျိုးသမီးတစ်ဦးသည် ၎င်း၏လသားအရွယ် ကလေးငယ်နှင့်အတူ တောင်ယာမှအပြန် တောင်ကျချောင်းရေဖြတ်ကူးစဉ် ရေချောင်းအတွင်းခြေချော်ကျပြီး ရေစီးထဲမျောပါသေဆုံးခဲ့ရကြောင်း သိရသည်။
“သူတို့သားအမိ တောင်ယာကနေအပြန် တောင်ကျချောင်းရေကိုဖြတ်ကူးတဲ့အချိန် ခြေချော်ပြီးတော့ ချောင်းထဲပြုတ်ကျသွားပြီး ရေစီးနဲ့မျောပါသွားတာ။ ကလေးကိုလည်း ကျောပိုးရက်နဲ့ပြုတ်ကျသွားတာဆိုတော့ ၂ ယောက်စလုံး ရေစီးအတိုင်းပါသွားကြတာပေါ့။ ရေစီးကအရမ်းသန်တော့ ကလေးတစ်နေရာ မိခင်တစ်နေရာကွဲသွားကြတယ်။ ကျနော်တို့အဖွဲ့ပြန်ရှာကြတဲ့အချိန် မိခင်ကိုတော့ ရေစီးကြောင့် ဒဏ်ရာတွေရပြီး သေဆုံးနေတာကို ပြန်တွေ့ပေမယ့် ကလေးကိုတော့ အခုထိ ရှာမတွေ့သေးပါဘူး။”ဟု နာရေးကူညီမှုအသင်း အောင်ပန်းက အဖွဲ့ဝင်တစ်ဦးက ပြောပြသည်။
လသားအရွယ်ကလေးငယ်၏ ရုပ်အလောင်းကို ဆက်လက်ရှာဖွေနေဆဲဖြစ်ပါသည်။ မိခင်ဖြစ်သူ၏ ရုပ်အလောင်းကိုတော့ နာရေးကူညီမှုအသင်း အောင်ပန်းအဖွဲ့နှင့် ရွာသူရွာသားများက အောင်ပန်းဆေးရုံ ရင်ခွဲရုံသို့ ပို့ဆောင်ပေးခဲ့ကြောင်း သတင်းရရှိသည်။
