ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
၂၀၂၀ ရွေးကောက်ပွဲမှာ ဖြစ်ပေါ်တဲ့ မဲမသမာမှုကြောင့် ရွေးကောက်ပွဲရလဒ် ပယ်ဖျက်ခံရမှုအပေါ် မဲမသမာမှုပြုလုပ်တဲ့ လွှတ်တော်ကိုယ်စားလှယ်ဟောင်းအချို့က လူထုရဲ့ စိတ်ခံစားချက်ကို အသုံးချပြီး သွေးထိုးလှုံ့ဆော်မှုများ ပြုလုပ်ခဲ့ခြင်းက အစပြုပြီး တိုင်းရင်းသားလက်နက်ကိုင်အဖွဲ့အစည်း EAO များအနေနဲ့လည်း နိုင်ငံရေးအကြပ်အတည်းပေါ် အခွင့်ကောင်းယူကာ တိုင်းရင်း သားရေး၊ နိုင်ငံရေး အကြောင်းပြချက်များနဲ့ တိုက်ခိုက်မှုများ ပြုလုပ်နေတယ်လို့ စစ်ခေါင်းဆောင် မင်းအောင်လှိုင် က ပြောပါတယ်။
ယမန်နေ့ နေပြည်တော်မှာ ပြုလုပ်တဲ့ အမျိုးသားကာကွယ်ရေးနှင့် လုံခြုံရေးကောင်စီ အစည်းအဝေးမှာ ပြောဆိုလိုက်တာပါ။
တိုင်းရင်းသားလက်နက်ကိုင်အဖွဲ့ဖြစ်တဲ့ KIA ၊ KNU၊ AA နဲ့ CNF တို့က PDF တို့နဲ့ပူးပေါင်းပြီး မြို့ရွာများရှိ ပြည်သူလူထုရဲ့ အသက်အိုးအိမ်များကို ဖျက်ဆီးတာ၊ နယ်မြေဒေသတည်ငြိမ်အေးချမ်းမှု မရှိအောင် ဖန်တီးတာနဲ့ အချို့ တိုင်းရင်းသားလက်နက်ကိုင်အဖွဲ့များအနေနဲ့က အခြေအနေကို အခွင့်ကောင်း ယူပြီး နယ်မြေချဲ့ထွင်နိုင်အောင် ကြိုးပမ်းနေတယ်လို့ စစ်ခေါင်ဆောင်က စွပ်စွဲပြောဆို လိုက်ပါတယ်။
တိုင်းရင်းသားလက်နက်ကိုင်အဖွဲ့နဲ့ PDF တို့ ပူးပေါင်းတိုက်ခိုက်မှုကြောင့် ၆ လအတွင်း နိုင်ငံ့ ဝန်ထမ်း ၃၈၃ ဦး သေဆုံးခဲ့ရတယ်လို့ဆိုပါတယ်။
၎င်းတိုက်ခိုက်မှုရဲ့ အကျိုးကို မည်သူမျှမရဘဲ နိုင်ငံရဲ့ ဆုံးရှုံးများသာဖြစ်ပြီး ဒီမိုကရေစီစနစ်ကို လိုလားပါတယ်လို့ ပြောဆိုပြီး လှုံ့ဆော်ပေးနေတဲ့ နိုင်ငံများ၊ လူပုဂ္ဂိုလ်များ စဥ်းစားကြရန် လိုတယ်လို့ ပြော ဆက်ပြောပါတယ်။
နိုင်ငံရေးနည်းလမ်းကို စားပွဲဝိုင်းပေါ်တွင် တွေ့ဆုံဆွေးနွေးခြင်းမှသာ အဖြေရှာနိုင်မှာဖြစ်တဲ့ အတွက် ငြိမ်းချမ်းရေးဆွေးနွေးမှုများကို အမြဲတမ်းကြိုဆို လမ်းဖွင့်ပေးထားတယ်လို့ ထည့်သွင်းပြော ကြားသွားပါတယ်။
