တိုက်ပွဲပြင်းထန်လာသည့် ပင်လောင်းမြို့နယ်၊ နမ်းနိန်းရွာ မီးရိူ့ခံနေရ 

ယနေ့ မတ်လ ၁၁ ရက်နေ့တွင် ပင်လောင်းမြို့နယ်၊ ပအိုဝ်းလူမျိုးအများစုနေထိုင်သော နမ်းနိန်းရွာသည် နှစ်ဖက်အပြန်အလှန်တိုက်ပွဲဖြစ်နေသည့်ကြားက လက်နက်ကိုင်အဖွဲ့တချို့က မီးရိူ့လိုက်ကြောင်း ကြားသိရပါသည်။

“အိမ်ခြေ ၅၀ လောက် အရိူ့ခံလိုက်ရတယ်လို့တော့ ကြားထားပါတယ်၊ ဘုန်းကြီးကျောင်းအသစ်လည်းပါသွားပါပြီ ရေစက်တောင်မချရသေးဘူး၊ အိမ်ခြေကတော့ ရာချီရှိပါတယ်” ဟု ပင်လောင်းမြို့နယ်မှ စစ်ဘေးရှောင်ကူညီစောင့်ရှောက်ရေးကော်မတီအဖွဲ့ဝင် တဦးက ပြောပါသည်။

အချို့လက်နက်ကိုင်တပ်ဖွဲ့ဝင်များသည် ရွာခံများစိုက်ပျိုးထားသော ကောက်ပဲသီးနှံများနှင့် ဆိုင်ကယ်များကို ယူသွားကြကြောင်း ရေးသားဖော်ပြမှုကိုလည်း တွေ့ရပါသည်။

စစ်ကောင်စီ၊ PNA ၊ KNDF နှင့် PDF လူငယ်များ အဖွဲ့စုံ ပစ်ခတ်တိုက်ခိုက်မှုတွင် ပါဝင်နေကြောင်း ပြောပါသည်။ ပစ်ခတ်တိုက်ခိုက်မှု ပြန်လည် ဖြစ်နေသည်မှာ ၄ ရက်ခန့် ရှိပြီဟု ပြောပါသည်။

နမ်းနိန်းရွာသူရွာသားအချို့လည်း ရွာထဲတွင် မနေနိုင်တော့ဘဲ အဝေးကသာ လှမ်းမျှော်ကြည့်နေသည့် အနေအထား ဖြစ်သည်ဟု သိရပါသည်။

နမ်းနိန်းရွာ၊ တောင်မဲသင်းရွာ၊ လုံးပြင်ရွာ၊ ပင်ပုံရွာ၊ တောင်စလုံးရွာ၊ မြောက်စလုံးရွာမှ ရွာခံ ၅၀၀၀ ကျော်သည် နီးစပ်သည့်ကျေးရွာများသို့ ထွက်ပြေးတိမ်းရှောင်ခိုလုံနေရကြောင်း သိရပါသည်။

Photos: နန်းဥမ္မာ