တာချီလိတ်မြို့ သုဿန်တစ်ခု၌ မွေးကင်းစကလေးငယ်တစ်ဦး စွန့်ပစ်ထားခြင်းခံခဲ့ရ

သျှမ်းပြည်နယ်အရှေ့ပိုင်း တာချီလိတ်မြို့ သုဿန်တစ်ခုအတွင်း၌ မွေးကင်းစသမီးငယ်တစ်ဦးကို မိခင်စိတ်မရှိသောသူတစ်ဦးမှ စွန့်ပစ်ထားမှု စက်တင်ဘာလ(၂၆)ရက်နေ့တွင် ဖြစ်ပွားခဲ့ကြောင်း သိရသည်။

အဆိုပါ ကလေးငယ်စွန့်ပစ်ခံထားရသည်ကို ဒေသခံများက တွေ့ရှိပြီး ဦးလှမိုး တာချီလိတ်လူမှုကူညီရေးအသင်းကို ဆက်သွယ်ပြောပြကာ သမီးငယ်လေးအား လူမှုကူညီရေးအသင်းက မိုးမေတ္တာ ပရဟိတလူငယ်ဖွံ့ဖြိုးရေးဂေဟာထံ ပို့ဆောင်ပေးခဲ့သည်။

“ည(၇)နာရီလောက်မှ အဲ့နားမှာ ဖြတ်သွားဖြတ်လာတွေက ကလေးငိုသံကိုကြားပြီးတော့ သွားကြည့်တော့မှ ကလေးငယ်တစ်ဦး စွန့်ပစ်ခံထားရတာကို ကျနော်တို့လူမှုကူညီရေးအသင်းကို ဖုန်းဆက်ပြောပြလာတယ်။ ကျနော်တို့ သွားကြည့်လိုက်ကြတဲ့အချိန်မှ ကလေးငယ်က ကျန်းမာနေပြီးတော့ အခုမွေးပြီး လာစွန့်ပစ်ထားပုံရတယ်။ အဲ့ဒါကြောင့် ကလေးကိုချက်ချင်းခေါ်လာပြီး ကျန်းမာရေးစောင့်ရှောက်မှုတွေပေးတယ်။ ကလေးရဲ့ ဘဝကို ကျနော်တို့က တာဝန်ယူကူညီစောင့်ရှောက်သွားပါမယ်။ မိခင်စိတ်မရှိတဲ့ ကလေးအမေများ ဒီလိုထပ်ဖြစ်လာခဲ့ရင် အဲ့လိုလုပ်ရပ်မျိုးလုံးဝမလုပ်ကြပါနဲ့ ။ ကျနော်တို့ ဆီကို ဆက်သွယ်ပြီး လာပေးကြပါ။” ဟု မိုးမေတ္တာ ပရဟိတလူငယ်ဖွံ့ဖြိုးရေးဂေဟာမှ အဖွဲ့ဝင်တစ်ဦးက ပြောပြသည်။

နောက်နောင်တွင် ယခုကဲ့သို့ ဖြစ်စဉ်များရှိခဲ့ပါက ယခုလို စွန့်ပစ်ခြင်းမပြုလုပ်ဘဲ ဦးလှမိုးတာချီလိတ်လူမှုကူညီရေးထံ လာရောက်အပ်နှံနိုင်ကြောင်း ၎င်းတို့အဖွဲ့မှ ရေးသားဖော်ပြထားသည်။