ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
ယနေ့ (၂၁.၇.၂၀၂၄) ရက်နေ့တွင် သျှမ်းပြည်နယ်မြောက်ပိုင်း ကျောက်မဲမြို့၌ စစ်ကောင်စီတပ်နှင့် TNLA တို့ တစ်နေ့လုံး အပြန်အလှန်ပစ်ခတ်တိုက်ခိုက်ခဲ့ကြပြီး တိုက်ပွဲပြင်းထန်ခဲ့သည်။ ယနေ့ည (၇:၃၀) အထိ ကျောက်မဲမြို့ နမ့်ဟူးတောင်းကျေးရွာ တရုတ်ကျောင်းအနီးအား စစ်ကောင်စီက တိုက်လေယာဉ်ဖြင့် ဗုံးကြဲတိုက်ခိုက်မှု ပြုလုပ်ခဲ့သည်။
“ မနေ့ကတည်းက စစ်သားတွေ မြို့ထဲကိုပြန်ဝင်လာနေကြတာနဲ့ TNLA နဲ့တိုက်ပွဲတွေ အပြင်းအထန်ပြန်ဖြစ်ပြီးတော့ မြို့ထဲကိုလည်း တိုက်လေယာဉ်နဲ့ တစ်နေ့ကုန် ဗုံးလာလာကြဲနေတယ်။ ကျောက်မဲမြို့အဝင်နားက နောင်ပိန်ကျွဲကုန်းရွာထဲက လူတွေကို မနေ့ကတည်းက အကုန်လုံးထွက်ခိုင်းနေတယ်။ နမ့်ဟူးတောင်းဘက်မှာလည်း ညနေ ၇ နာရီကျော်လောက်ပဲ လက်နက်ကြီးရော လေယာဉ်နဲ့ပါ ဗုံးလာကြဲသွားသေးတယ်။ ဖုန်းလိုင်းက နေရာတိုင်းမရတော့ ဘယ်သူတွေအိမ်ထိကိုပြီး လူဘယ်နှစ်ထိခိုက်တယ်ဆိုတာတော့ မသိနိုင်သေးဘူးဗျ။ ကျောက်မဲထဲမှာ ပိတ်မိနေတဲ့သူတွေ အများကြီးပဲ။” ဟု ကျောက်မဲမြို့ ရန်ကင်းရပ်ကွက်တွင် ပိတ်မိနေသူပြည်သူတစ်ဦးကပြောသည်။
ညနေပိုင်းခန့်က ကျောက်မဲမြို့ ကျောက်တောင်ဘက်ခြမ်းတွင် အပြန်အလှန်ပစ်ခတ်တိုက်မှုဖြစ်ပြီး လက်ရှိသတင်းရေးသားချိန်တွင် နမ့်စစ်လင်းကျောင်းတိုက်ဘက်၌ တိုက်ပွဲဖြစ်ပွားနေသည်။
အလားတူ လွယ်ခွန်တောင်၊ အုတ်ကျင်းရပ်ကွက် နှင့် အင်ကြင်းတောင်အနီး တိုက်ပွဲပြင်းထန်နေပြီး အဆိုပါနေရာများတွင် နေထိုင်သော ဒေသခံပြည်သူများအနေဖြင့် အိမ်ပြင်မထွက်ကြရန် ဒေသခံတစ်ဦးက အကြံပြုထားသည်။
သတင်းအရင်းအမြစ်တစ်ဦး၏ ပြောပြချက်အရ ယနေ့ ညနေပိုင်းခန့်တွင် နမ့်စစ်လင်းကျောင်းတိုက်အနီးရှိ နေအိမ်တစ်လုံးပေါ် လက်နက်ကြီးကျည်ကျရောက်ပေါက်ကွဲ ပြည်သူတစ်ဦးသေဆုံးခဲ့သည်ဟုဆိုသည်။
