စံချိန်တင်ရေကြီးမှုဖြစ်ပေါ်ခဲ့တဲ့ အင်းလေးကန် ရေစတင် ခမ်းခြောက်လာမှုဖြစ်လာ

စံချိန်တင်ရေကြီးမှုဖြစ်ပေါ်ခဲ့သည့် သျှမ်းပြည်နယ်တောင်ပိုင်း၊ ညောင်ရွှေမြို့နယ်ရှိ အင်းလေးကန်သည် ယခုကန်အတွင်းရှိ နေရာအချို့တွင် ရေတွေခမ်းခြောက်နေပြီး ကုန်းခေါင်မြေအဖြစ်သို့ ရောက်ရှိနေပြီဖြစ်ကြောင်း ဒေသတွင်းသတင်းမြစ်မှ သိရသည်။

ညောင်ရွှေမြို့နယ်၊ အင်းလေး-ဟဲရွာမ ဘက်တွင် ရေတွေခမ်းခြောက်ကာ ရေစီးချောင်းငယ်သာသာ ကျန်ရှိတော့သည့်အတွက်ကြောင့် ၎င်းဘက်မှာနေထိုင်သည့် အင်းလေးဒေသခံ ပြည်သူများသည် လှေနှင့်စက်လှေများ မောင်းလို့မရတော့ဘဲ သွားလာရေး နှင့် စိုက်ပျိုးရေးအတွက် အခက်အခဲများ ကြုံတွေ့နေရကြောင်း သိရသည်။

ပြီးခဲ့သည့် ၂၀၂၄ ခုနှစ်တွင် သျှမ်းပြည်တွင်းရှိ စံချိန်တင် ရေကြီးလျှံမှုတွေပေါ်ကာ အင်းလေးကန်သည်လည်း တစ်ခုအပါအဝင်ဖြစ်သည်၊

အင်းလေးကန်သည် ၃ လအတွင်း ရေ ၁၂ပေ လျော့ကျသွားပြီး မကြုံစဖူး ရေတွေပြန်ကျဆင်းကာ အင်းလေး ဟဲယားရွာမ ရေပေါ်ဈေးနှင့် ရေဝပ်သည့်ဧရိယာများမှာ နှုံးမြေများဖြင့် ပိတ်နေပြီး စက်လှေများ သွားလာလို့မရကြောင်း သိရသည်။

နွေရာသီကာလမှာ နေအပူချိန် ပူပြင်းလာသည်နှင့်အမျှ အင်းလေးကန်အတွင်း ရေခမ်းခြောက်မှု ပိုမိုဆိုးရွားလာမည်ကို ဒေသခံများက စိုးရိမ်နေကြသလို အင်းလေးကန်သည်လည်း အရင်နှစ်တွေကထက် ရေကျနှုန်း ပိုမိုမြန်ဆန်လာကြောင်း သိရသည်။