စစ်ကောင်စီနှင့် PNO ပြည်သူ့စစ်က PNLA ကို စစ်ကြောင်းထိုး တိုက်ခိုက်သဖြင့် မောက်မယ်မြို့နယ် ဟိုနမ့်ဒေသတွင် တိုက်ပွဲပြင်းထန်၊

သျှမ်းပြည်နယ်တောင်ပိုင်း၊ မောက်မယ်မြို့နယ် ဟိုနမ့်ဒေသတွင် စစ်ကောင်စီနှင့် ပအိုဝ်းအမျိုးသားအဖွဲ့ချုပ် PNO ပြည်သူ့စစ်က ပအိုဝ်းအမျိုးသားလွတ်မြောက်ရေးတပ်မတော် PNLA တပ်စခန်းကို စစ်ကြောင်းထိုး တိုက်ခိုက်လာသဖြင့် တိုက်ပွဲပြင်းထန်နေလျက်ရှိကြောင်း သိရသည်။

ပြီးခဲ့သည့် နိုဝင်ဘာလ ၂၀ ရက်မှ စတင်ပြီး မောက်မယ်မြို့နယ်ရှိ ဟိုနမ့်ဒေသမှာ စစ်ကောင်စီတပ်၊ PNO ပြည်သူ့စစ်နှင့် PNLA တို့ နှစ်ဖက်တိုက်ပွဲဖြစ်ပွားရာ စစ်ကောင်စီနှင့် ပူးပေါင်းတပ်ဘက်က တပ်သား ၃၀ ကျော် သေဆုံး‌ကြောင်း PNLA ၏ စစ်ရေး သတင်းရင်းမြစ်ထံမှ သိရသည်။

ယမန်နေ့ နိုဝင်ဘာလ ၂၆ ရက်နေ့တွင်လည်း မောက်မယ်မြို့နယ်၊ ဟိုနမ့်ဒေသ တောင်ဘက်ရှိ PNLA ၏ တပ်စခန်းကို စစ်ကောင်စီတပ်နှင့် PNO ပြည်သူ့စစ်တို့က လက်နက်ကြီးများ ဒရုံးများဖြင့် ထိုးစစ်ဆင်တိုက်ခိုက်ခဲ့ကြောင်း PNLA ထံမှ သိရသည်။

မောက်မယ်မြို့နယ် ဟိုနမ့်ဒေသအတွင်း တိုက်ပွဲမ‌ဖော်ဆောင်ကြဖို့ ယခုနှစ် ပြီးခဲ့သည့် မတ်လ(၈)ရက်နေ့က ပအိုဝ်းသံဃာတော်များက အဆိုပါ နယ်မြေတွင်း လှုပ်ရှားနေသည့်အဖွဲ့ဖြစ်သော RCSS၊ PNO ပြည်သူ့စစ် နှင့် PNLA တပ်များထံကို မေတ္တာရပ်ခံ ထားခြင်းဖြစ်ကြောင်း သိရသည်။