ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်မြောက်ပိုင်း ကျောက်မဲမြို့နယ်အတွင်း ယနေ့ နံနက် (၅) နာရီကျော်ခန့်က စတင်ပြီး စစ်ကောင်စီနှင့် TNLA တို့ တိုက်ပွဲအပြင်းအထန် ဖြစ်ပွားခဲ့သည်။
ယနေ့ နေ့လည်ပိုင်းအထိ တိုက်ပွဲသံများ ကြားနေရဆဲဖြစ်ပြီး လက်နက်ကြီးဖြင့် အပြန်အလှန်ပစ်ခတ်တိုက်ခိုက်မှုများ ပြုလုပ်လျက်ရှိသည်။
တိုက်ပွဲကြားပိတ်မိနေသော ပြည်သူလူထု နေအိမ်များအနီးလက်နက်ကြီးကျည် ကျရောက်ပေါက်ကွဲမှုကြောင့် လက်ရှိအချိန်အထိ ဒေသခံပြည်သူ (၃) ဦးထက်မနည်း သေဆုံးကြောင်း သိရသည်။
ကျောက်မဲမြို့ (၉) ရပ်ကွက်၌ အမျိုးသမီးတစ်ဦး ဦးခေါင်းအား ကျည်ထိမှန်ပြီး ယနေ့ နံနက်ပိုင်းက သေဆုံးခဲ့ရသည်။ ဒါ့အပြင် ကျောက်မဲမြို့ (၈) ရပ်ကွက် အခွန်လွတ်ဈေးအနီး၌ လက်နက်ကြီးကျည်ကျရောက်ပေါက်ကွဲပြီး အမျိုးသားတစ်ဦး ကျည်စထိမှန်သေဆုံးခဲ့သည်။ အလားတူ ကျောက်မဲမြို့နယ် နားအိုက်ခန့်ကျေးရွာမှ ပြည်သူတစ်ဦးလည်း ကျည်ထိမှန်ပြီး သေဆုံးခဲ့ရသည်။ တိုက်ပွဲဆက်လက်ဖြစ်ပွားနေသေးသောကြောင့် ကျည်ထိမှန်သူများအလောင်းအား သယ်ဆောင်ရန် ခက်ခဲနေသေးတယ်သည်ဟု လူမှုကူညီရေးအသင်းထံမှ စုံစမ်းသိရှိရသည်။ ဒါ့အပြင် လက်နက်ကြီးကျည် ကျရောက်ပေါက်ကွဲမှုကြောင့် ဒေသခံမိဘပြည်သူအချို့လည်း ထိခိုက်ဒဏ်ရာရရှိထားသည်။
ကျောက်မဲ-သီပေါကား လမ်းမကြီးပေါ်ရှိ ဆွတ်လမ်းတံတားလည်း မိုင်းခွဲဖျက်ဆီးခံရပြီဟု သိရသည်။
လက်ရှိအချိန်ထိ စစ်ကောင်စီနှင့် TNLA တို့သည် နောင်ချိုမြို့နယ်၊ ကျောက်မဲမြို့နယ်၊ မိုးကုတ်မြို့နယ်များ၌ တိုက်ပွဲဆက်လက်ဖြစ်ပွားနေသည်။