ဖမ်းဆီးခံထားရသည့် ဒေါ်အောင်ဆန်းစုကြည် ထွက်လာသော်လည်း မပြောင်းလဲ ပြည်သူ့ဆန္ဒအတိုင်းရှေ့ဆက်မည်ဟု NUG ဝန်ကြီးချုပ်ပြော | အရေးပေါ်ကာလသက်တမ်း (၆) လ ထပ်တိုးကြောင်း အမျိုးသားကာကွယ်ရေးနှင့်လုံခြုံရေးကောင်စီ အစည်းအဝေးကျင်းပပြီးသတ်မှတ်
သျှမ်းပြည်နယ်မြောက်ပိုင်း ကျောက်မဲမြို့နယ် ဂုတ်တွင်းတစ်ကြောရှိ ကျေးရွာများတွင် ယမန်နေ့(၁၃.၁၁.၂၀၂၃) ရက်နေ့ ညပိုင်း၌ စစ်ကောင်စီတပ်မှ လက်နက်ကြီးအပြင် လေကြောင်းတိုက်ခိုက်မှုပြုလုပ်ခဲ့သည်။ ယမန်နေ့ နံနက်ပိုင်းကစပြီး လက်နက်ကြီးပစ်ခတ်သံများဆက်တိုက်ထွက်ပေါ်ခဲ့ပြီး ညနက်ပိုင်း (၁) နာရီဝန်းကျင်အထိ ဂုတ်တွင်းတစ်ကြော လက်နက်ကြီးသံများ ကြားနေရကြောင်း ဒေသခံများက ဆိုသည်။
ကျောက်မဲမြို့နယ် ပင်ပေါကျေးရွာအုပ်စု ဇီးပင်စခန်းကျေးရွာရှိ အဆောက်အအုံတစ်ခုပေါ်ကို လက်နက်ကြီးကျရောက်ပေါက်ကွဲခဲ့ပြီး ပျက်စီးမှုဖြစ်ပွားခဲ့သည်။
“ အရင်တစ်နေ့ညက နောင်ပိန်တိုက်နယ် ပင်တိန်ကျေးရွာအရှေ့ဘက်က လယ်ကွက်ထဲကို တိုက်လေယာဉ်က ဗုံးအကြီးကြီးလာပစ်ချသွားတယ်။ ဗုံးပေါက်ကွဲမှုအရမ်းပြင်းလွန်းလို့ တစ်ရွာလုံးထိတ်လန့်ပြီး လန့်နိုးကုန်ကြတယ်။ မနက်ရောက်တော့ ဘယ်သူကနေ စပြီး ကောလာဟလလွှင့်လိုက်တယ်မသိဘူး။ နောင်ပိန်ကလူတွေ နောင်ပိန်နဲ့(၃)မိုင်အကွာအဝေးအထိ ရှောင်နေကြဖို့ ပြောကြလို့ ရွာသူ/သားတွေ စိုးရိမ်ကြောက်လန့်ပြီး ထွက်ပြေးကုန်တယ်။ ဒီနေ့တော့ ရွာထဲကိုရွာသူ/ရွာသားတွေ ပြန်ဝင်လာနေပြီဖြစ်သလို ဒီမှာလည်း စစ်ဘေးရှောင်တွေက (၇၀၀) ကျော်လောက်ရှိနေသေးတယ်။ ညကတော့ ဂုတ်တွင်းဘက်ခြမ်းမှာ တစ်ညလုံး လက်နက်ကြီးသံတွေရော အောက်ကနေပြန်ပစ်တဲ့ သေနတ်သံတွေရော ဆက်တိုက်ကြားနေရတယ်။ အခုဒီမနက်တော့ ငြိမ်နေပါသေးတယ်။” ဟု နောင်ပိန်ဒေသခံတစ်ဦးက ပြောပြသည်။
ယနေ့ နံနက်ပိုင်း (၇) နာရီခန့်တွင် ဂုတ်တွင်းဘက်ခြမ်းတွင် လက်နက်ကြီး ကျသံ (၃) ချက်ခန့်ကြားခဲ့ရပြီး ယခုအချိန်တော့ ငြိမ်သက်နေသေးဟုဆိုသည်။ နောင်ပိန်တိုက်နယ်အတွင်း MPT ဖုန်းလိုင်းမှလွဲ၍ ကျန်သည့်ဖုန်းလိုင်းများ ပြတ်တောက်လျက်ရှိကြောင်း သတင်းရရှိသည်။
