ကျောက်ဂူဒေသမှာ စစ်ကောင်စီမှ လေကြောင်းတိုက်ခိုက်ပြီး အရပ်သားပြည်သူ(၃)ဦးသေဆုံးကာ (၁၃)ဦး ဒဏ်ရာရရှိ၊ အစိုးရဌာနမှ ဝန်ထမ်းများအားလုံး နေရာပြောင်းရွေ့ကြဖို့ စစ်ကောင်စီမှ ညွှန်ကြားထား

ရပ်စောက်မြို့နယ်၊ ကျောက်ဂူဒေသမှာ ဓနုပြည်သူ့လွတ်မြောက်ရေးတပ်တော်(DPLA)နဲ့ စစ်ကောင်စီတပ်တို့က ယမန်နေ့ ဇန်နဝါရီလ(၁၆)ရက်နေ့အထိ တိုက်ပွဲများ ဆက်လက်ဖြစ်ပွား နေပြီး စစ်ကောင်စီရဲ့ လေကြောင်း တိုက်ခိုက်မှုကြောင့် အရပ်သားပြည်သူ(၃)ဦး သေဆုံးကာ (၁၃)ဦး ဒဏ်ရာရတယ်လို့ သိရပါတယ်။

ယမန်နေ့ တစ်ရက်ထဲတွင် စစ်ကောင်စီဘက်က Y-12 လေယာဥ်ဖြင့် ဗုံးအလုံး(၅၀)ကျော် ကြဲချ တိုက်ခိုက်ခဲ့တဲ့အတွက်ကြောင့် အမျိုးသမီး(၂)ဦးနဲ့ အမျိုးသား(၁)ဦး အသက်ဆုံးရှုံးခဲ့ရပြီး ကလေး(၁)ဦး အပါအဝင် (၁၃)ဦး ထိခိုက်ဒဏ်ရာရှိခဲ့တယ်လို့ DPLA က ယနေ့မှာ ထုတ်ပြန်ထားပါတယ်။

ကျောက်ဂူတိုက်နယ်မှာ ဖြစ်ပွားတဲ့ နှစ်ဖက်တိုက်ပွဲအတွင်း စစ်ကောင်စီ၏ လက်နက်ကြီး ပစ်ခတ်မှုကြောင့် အရပ်သားနေအိမ်များလည်း မီးလောင်ပျက်စီးခဲ့ရတယ်လို့ သိရပါတယ်။

“ကျောက်ဂူတိုက်ပွဲမှာ DPLA နဲ့ ပူးပေါင်းတပ်တွေက ကျောက်ဂူအမြောက်တပ် (အမတ−၃၄၉)ကို ဝင်ရောက်သိမ်းပိုက်ဖို့ တိုက်ခိုက်နေတာ ယခုလက်ရှိက တိုက်ပွဲပြင်းထန်ပြီး နှစ်ဖက်စလုံးက ၅၀/၅၀ ပဲ၊ ကျောက်ဂူမှာရှိတဲ့ ဌာနဆိုင်ရာ က ဝန်ထမ်းတွေ အားလုံးကိုလည်း အထက်က လူကြီးက နေရာကနေ ရွေ့ခိုင်းထားတယ်” လို့ စစ်ကောင်စီရဲ့ တပ်တွင်းဖရဲသီးထံမှ သိရပါတယ်။

ကျောက်ဂူဒေသမှာ စစ်ကောင်စီဘက်က အင်အားဖြည့်တင်းမှုများကြောင့် တိုက်ပွဲများ ဆက်လက်ဖြစ်ပွားနေတယ်လို့ သိရပါတယ်။